Read Mizo_Old_version Joba 32 Bible Online

Joba 32 - Mizo_Old_version bible

Joba 32

¹Tin, hêng mi pathumte hian Joba chu an chhâng zêl ta lo va, fel a intih êm avângin.

²Tichuan, Barakela fapa Elihua, Buz mi, Ram thlahho zînga mi chu a thinrim ta êm êm mai a; Pathian ai maha amah thiam a inchantîr avângin Joba chungah chuan a thin a rim a ni.

³Joba ṭhian pathumte chungah pawh chuan a thinrim bawk a, Joba chu thiam lo an ti chunga chhân ngaihna an hriat loh avângin.

⁴Anni chu a aia upa an nih avângin Elihua chu Joba hnênah thu sawi ve lovin a lo inkhêk reng a.

⁵Tin, Elihua chuan hêng mi pathumte hian chhân ngaihna rêng an hre ta lo tih a hriatin a thinur ta hle mai a.

⁶Tichuan, Barakela fapa Elihua, Buz mi chuan a chhâng a, heti hian a ti a: Ka naupang a, nangni in upa a, Chu vâng chuan ka tîm a, Ka ngaih dân pawh ka hrilh ngam lo che u a,

⁷“Khuareiin hril sela, Kum tamin finna zirtîr teh se,” ka ti a.

⁸Mahse, mi thil hriat thiamtîrtu chu Mihringa thlarau awm, Engkimtitheia thaw chu a ni.

⁹Kum tam hi an fing chuang lo va, Upaten thu dik an hre thiam chuang lo.

¹⁰Chu vâng chuan, “Mi ngaithla ula, Ka ngaih dân ka han sawi teh ang,” ka ti a ni.

¹¹Ngai teh u, in thu ka nghâk reng a, Sawi tûr in dap thleng khân, In ṭan dânah beng ka lo chhi reng a.

¹²A ni, ngun takin ka ngaithla che u a, Ngai rawh u, Joba hnial hneh thei emaw, A thu letthla thei emaw in zîngah tu mah in awm lo.

¹³Fîmkhur rawh u; “Fing tak kan tâwk a lo ni, Mihring ni lovin, Pathian chauhvin a hneh thei ang,” In ti rawk ang e.

¹⁴A thuin kei mi la vawm ve lo va, In tih dân ang maiin ka chhâng dâwn hek lo.

¹⁵An inkhâp thlu dêr a, an dan reng hi, Kam khat mah sawi tûr an nei ta lo.

¹⁶Dang renga dinga an chhân tawh loh avâng hian, Kei pawhin ka nghâk ve reng dâwn em ni?

¹⁷Keima pualin ka chhâng ang a, Ka ngaih dan ka han sawi teh ang.

¹⁸Thu lah ka ngah hle si a, Chhûng lam rilruin mi tur nasa a ni.

¹⁹Ngai rawh u, ka thinlung hi uain hu chhuahna nei lo ang a ni a. Uain peng thar angin a puak dâwn ṭêp a ni.

²⁰Thuin ka inhrithla dâwn e, Ka kâ ka âng ang a, ka chhâng ang.

²¹Tu mah ka zahpah lo mai ang a, Tu mah ka fak der hek lo vang.

²²Fak der ka thiam si lo va; Chuti lo chu, mi Siamtuin mi la bo thuai mai ang.