Read Mizo_Old_version Joba 33 Bible Online

Joba 33 - Mizo_Old_version bible

Joba 33

¹Eng pawh ni se, Joba, ka ṭawng hi ngaithla la, Ka thu zawng zawngah hian beng lo chhi teh.

²Ngai teh, hei ka kâ ka âng ta a, Ka leiin thu a sawi hi.

³Ka thute chuan ka thinlung ngîlzia a tilang a, Ka hmui chuan a thil hriat chu dik takin a sawi dâwn e.

⁴Pathian thlarau chuan mi siam a, Engkimtitheia thaw chuan nunna mi pe.

⁵I theih chuan mi chhâng la, Ṭan khawh la, ka hmaah hian I thute chu siam rem rawh le.

⁶Ngai teh, Pathian lam thu-ah chuan Nangmah ang bawk ka ni a, Hluma siam ve bawk ka ni.

⁷Ngai teh, kei hi mi hlau suh la, Ka nawr lutuk lo vang che.

⁸Ka beng hriatah i sawi tawh tak a, I thu ri chu ka lo hre tawh a.

⁹“Ka thiang a ni, bawhchhiatna nei lovin; Ka fihlîm a ni, khawlohna nei lovin;

¹⁰I e, ka chungah remchâng a dap chhuak a, A hmêlmaah mi chhiar a ni;

¹¹Ka keah kawl mi bun a, Ka kalna zawng zawng a chhui chhuak a ni,” i ti a.

¹²Ngai teh, ka chhâng ang che, Hetah hian i fel zo zân lo ve; Pathian chu mihring aiin a ropui zâwk a ni.

¹³Thu khat mah a chhân loh avângin Engah nge amah i beih le?

¹⁴Pathianin kawng khatin thu a sawi ṭhîn a, A ni, kawng hnih pawhin, pawisak loh pawh ni se.

¹⁵Mumangah, zân inlârnaah chuan Mite tui taka an muthilha, Khumlaizâwla an mut chiah chiah laiin,

¹⁶Mite beng chu a tihawng a, An thu dawn chu a tinghet a,

¹⁷Mihring chu a thiltih ṭhulhtîra, A chapona chu a thupsak theih nân;

¹⁸Ani chu thlâna liam lovin a vawng a, A nun pawh khandaih laka boral lovin.

¹⁹A khumlaizâwlah natnaa thununin a awm a, A ruh zawng zawng na sup supin;

²⁰Tichuan, chaw te a hua a, Sa tui hmêl takte pawh a duh lo va,

²¹A tisa a lo chêr deuh deuh va, hmuh tham a ni lo va, Ruh hlîr ruh hlîr a lo ni a.

²²Ani chuan thihna kotlâng a hnaih a, A nun chuan tiboraltute a hnaih tawh a ni.

²³Mi hnêna a tâna ṭha hriattîr tûrin A tân vântirhkoh, palai pakhat, Sâng zînga mi awm sela;

²⁴Tin, chu mi chuan amah duhsak takin, “Thlâna liam lovin chhanhim ang che, Tlanna ka hmu ta e;

²⁵A taksa hi tleirâwl thar leh sela, A vânglai chakna nite chu lo kîr leh tawh se,” ti sela;

²⁶Chu mi chu Pathian hnênah a ṭawngṭai a, Ani chuan a lo pawm a. A hmêl chu hlim takin a hmu ang a. Anin a hnênah felna chu a pe leh ang.

²⁷Mite hmaah hla sain: “Ka sual a, thil dik chu ka tikhawlo va; Mahse, mi thungrûl lo ve.

²⁸Thlâna liam lo tûrin mi chhanhim a, Ka nunin khaw êng a lo hmu ang,” a ti a.

²⁹Ngai rawh, mihringin nunna êng a hmuh theih nâna Thlân ata hruai kîr tûrin, Pathianin hêng thil zawng zawng hi, Mihring hnênah vawi hnih vawi thum a ti a ni.

³¹E, Joba, ngun takin mi ngaithla teh, Lo ngawi la, ka han sawi ang e.

³²Sawi tûr i neih chuan mi chhâng la, Sawi rawh, thiam chantîr che ka duh a ni;

³³Chuti a nih loh chuan, mi ngaithla rawh, Lo ngawi la, finna ka zirtîr ang che.