Read Mizo_Old_version Joba 34 Bible Online

Joba 34 - Mizo_Old_version bible

Joba 34

¹Tin, Elihua chuan a sawi zêl a:

²Nangni mi fingte u, ka thute ngaithla ula, Nangni mi thiamte u, in beng dawh rawh u.

³Kâin ei mi a hria angin, Bengin thu a thliar a ni.

⁴Kan tâna dik chu thlang ila, A ṭha chu keimahniin i chian ang u.

⁵Joba chuan, “Fel zawng ka fel a ni, Pathianin ka thiamna mi hnâwlsakin,

⁶Ka thiam reng chung hi dawtheiah mi chhiar mai pawh a; Bawhchhiatna ka nei lo chungin Ka hliam chu tihdam rual a ni lo,” a ti si.

⁷Joba ang hi tu nge awm, Tui anga deuna ina,

⁸Khawlohna titute pâwla, Mi suaksualte nêna lêng ṭhîn chu?

⁹“Pathian chunga lâwm hi Mihringin engah mah a sâwtpui lo ve,” a ti vei nên.

¹⁰Chuvângin, nangni, mi rilru neite u, Mi ngaithla rawh u, Pathian chuan thil suaksual tiin, Engkimtitheia chuan thil dik lo chu a ti teuh lo vang.

¹¹Mite an thiltih ang zêlin a thungrûl ang a, Mi tin an awm dân ang zêlin an chungah a thlentîr dâwn si a.

¹²A ni, Pathian chuan suaksual takin a ti lul lo vang a, Engkimtitheia chuan a rêl khawlo hek lo vang.

¹³Tu nge lei hi amah awptîra, Khawvêl pum pui hi a hnêna kawltîr ni?

¹⁴Ama thlarau chu a hnêna a lâk kîra, Ama thaw chu a hnêna a lâk khâwm leh chuan,

¹⁵Mi nung zawng zawng an boral rual ang a, Mihring chu vaivutah a chang leh mai ang.

¹⁶Hriat thiamna i neih chuan hei hi ngaithla la, Ka ṭawng ri hi bengkhawn rawh:

¹⁷Thu dik hawtu chuan ro a rêl ang em ni? Mi fel leh thiltitheia chu thiam loh i chantîr ang em ni?

¹⁸Ani chu lalber hnêna, “Tlâktlailopa,” Mi lian hnêna, “Suaksualpa,” titu,

¹⁹Hotute pawh duhsak bîk lo leh, Mi rethei aia mi hausa ngaihsak chuang lo a ni a, An zain a kutchhuak an ni si a.

²⁰Mit khap kâr lovah an thi a, Zanlaiah mite an khûr a, an ral a, Mi chakte pawh kut lova lâk bovin an awm.

²¹Mihring awm dân chungah mit a lên a, A pheikhai zawng zawng a hmu vek si.

²²Khawlohna titute an bihrûk theihna tûr Thim a awm lo va, thihna daihlim a awm hek lo.

²³Pathian hmaa rorêlnaa kal tûrin Mihring tân hun bi a ruat si lo.

²⁴Mi chakte chu a tiṭiau va - an thu rêl lovin, An hmunah mi dangte a dah ṭhîn.

²⁵Chutiang chuan an thiltihte chu hriain, Zânah anmahni a tichhia a, a nuai bo va.

²⁶Mite mit hmuhah anni chu Mi sual hremin a hrem a,

²⁷Ama laka an pên bo avâng leh, A dânte an pawisak loh avângin;

²⁸A beng thleng khawp khawpin retheite an rûmtîr a, Ani chuan hnehchhiahte au thâwm chu a lo hria a.

²⁹Ani chu lo ngawi sela tu nge thiam loh chantîr thei ang? A hmêl a thup laiin tuin nge hmu thei ang? Hnam tân emaw, mi mal tân emaw thuhmun a ni.

³⁰Pathian hre lo mi chuan ro a rêl lohna tûr leh Mipui an âwkai loh nân.

³¹Miin Pathian hnênah chuan, “Pawi ka khawih lo na a, hremna ka tuar si;

³²Ka hmuh loh chu mi zirtîr la, Khawlohna ka tih pawhin, Ka ti tawh lo vang,” a ti ngai em ni?

³³Pathian thungrulhna chu i duh ang kher em ni dâwn a, I lo hnial ni? Kei ni lovin nangin i thlang tûr a ni; Chuvângin, i hriat chu sawi rawh khai.

³⁴Mi rilru neite leh mi fingte, Mi ngaithla apiang pawhin,

³⁵“Joba hi chinchâng hre lovin a ṭawng mai mai a ni e, A thu-ah hian finna a awm lo ve,” mi tihpui ang.

³⁶Joba hi mi sual ṭawnga a ṭawng avâng hian Fiah fai vekin awm se ka ti a ni.

³⁷A sual belhchhahin a hel a, Kan zîngah a kut a bêng a, Pathian chungah a thu a tuitam mai a nih hi.