Read Mizo_Old_version Joba 35 Bible Online

Joba 35 - Mizo_Old_version bible

Joba 35

¹Tin, Elihua chuan a sawi zêl a:

²Hei hi dikah i ngai em, “Pathian hmaah ka fel a ni,” i tih hi?

³“Thil tisual lo ila ka tân ṭhat chuanna eng nge awma, Ka tân hlâwkna eng nge awm chuang?” i tih te hi?

⁴Ka han chhâng teh ang che, Nang leh i pâwlpuite nên.

⁵Vân lam dâk la, en teh, Chhûmte khi en la, nang aia a sân zâwk khi.

⁶Thil i tihsual pawhin, a tân eng nge pawi? I bawhchiatna a pun pawhin, a tân eng nge pawi ang?

⁷I fel pawhin, a tân hnemhnânpui tûr i awm em ni? I kut ata eng nge a dawn?

⁸I suahsualna chuan nang ang mihring chauh a khawih a, I felna chuan mihring fa chauh a khawih thei a ni.

⁹Hnehchhiahna a tam avângin an rûm a, Mi chakte bân avângin chhan ngaiin an au va.

¹⁰Mahse, tu mân, “Min siamtu Pathian chu khawiah nge, Zâna hla min saktîrtu,

¹¹Hnuailêngte aia min zirtîr hnem zâwktu, Chunglêngte aia finga min siamtu chu?” an ti lo.

¹²Tah chuan an rûm a, tu mân an chhâng lo, Mi sualte chapona avângin.

¹³Pathianin dîlna lawilo chu a ngaithla lo vang a, Engkimtitheian a ngaihsak hek lo vang,

¹⁴Nang lek phei chu e! “Amah ka hmu lo ve, Thu rêl tûr chu a hmaah a awm reng a, Amah ka nghâk reng e,” i han ti a.

¹⁵Tûnah hian thinrima a rawn hrem mai loh avâng leh, Uanthuanna a rawn pawisak mai loh avângin,

¹⁶Joba hian a kâ a âng mai mai a, Chinchâng hre lovin a thu a tuitam mai a nih hi.