Read Mizo_Old_version Joba 36 Bible Online

Joba 36 - Mizo_Old_version bible

Joba 36

¹Elihua chuan a sawi zêl a:

²Ngawi rih la, ka kawhhmuh ang che; Pathian hmingin sawi tûr ka la nei cheu a nia.

³Ka hriatna ka han fawm khâwm vak teh ang, Mi siamtu chu felna ka bel dâwn a ni.

⁴Ka thu a daw hauh lo a nia, Hriatna famkim nei chu i kiangah a awm hi.

⁵Ngai rawh, Pathian chu chak tak a ni a, Tu mah a hmusit mai lo; Rilru chaknaah chuan a ropui a ni.

⁶Mi suaksual chu a zuah lo va, Hnehchhiahte erawh chu dik takin a rêlsak ṭhîn.

⁷Mi felte chu a ensan lo va, Lalṭhuthlênga lalte kiangah Kumkhuain a ṭhuttîr a, chawimawiin an awm zâwk ṭhîn.

⁸Kawl bun an lo niha, Hnehchhiahna hruia phuar an lo nih chuan,

⁹An thiltih leh an bawhchhiatnate a entîr a, An lo chapo tawhziate nên.

¹⁰Zirtîrna lamah an beng a tivâr a, Khawlohna lakah an inlamlêt nân thu a pe a.

¹¹An pawisaka a rawng an bâwl chuan, An nite chu hmuingîl takin an hmang ral ang a, An kumte chu nuam takin.

¹²An pawisak loh erawh chuan khandaihin an boral ang a, Hriatna lovin an thi ang.

¹³Thinlunga Pathian zah lo mite chuan thinur an khâwl a, Ama phuar an nih pawhin ṭanpui dîlin an au lo.

¹⁴Mi bawlhhlawhte zîngah chuan An vânglaiin an thi a.

¹⁵Ani chuan hrehawm tuartu chu A hrehawmna hmangin a tichhuak a, Hnehchhiahna hmangin a beng a tivâr a.

¹⁶A ni, manganna ata chu hmun zau tak, Nêkchêp lohnaah chuan a hruai chhuak ang chia, I chawhlui chu thauvin a khat ang.

¹⁷Mahse, nang chu mi suaksualte sawisêlnain i khat a, Sawisêlna leh rorêl dikna chuan a man che a ni.

¹⁸Thinur avângin hmuhsitna rilru i pu dah ang e, Tlanna man nasatzia hian hruai bo che suh se.

¹⁹Manganga i awm loh nân i awkâ emaw, I thahrui chakna emaw a tâwk em ni?

²⁰Zân chu châk suh, mite an hmun ata an boralna hun a ni e.

²¹Fîmkhur la, khawlohna lam hawi suh, Hei hi hrehawm tuar aia i thlan a ni si.

²²Ngai rawh, Pathian chuan a theihnain zo takin a ti a ni; Tu nge amah ang zirtîrtu awm?

²³Tu nge a tih dân tûr ruatsak? Tu nge, “I ti dik lo,” ti thei?

²⁴A hnathawh tiropui tûrin hre reng rawh, Miten zaia an chawi ṭhina chu.

²⁵Mi tinin chu chu an en a, Miten hla tak aṭangin an thlîr a.

²⁶Ngai rawh, Pathian chu a ropui e, kan lo hre lo pawh a; A kum zât te chu zawn chhuah rual a ni lo.

²⁷Tui mal far tê tê chu a hîp chho va, Tuihûa intifîmin ruahah a chang a,

²⁸Vânin a sûrtîr a, Mihring chungah a tla buan buan ṭhîn.

²⁹A ni, chhûm ṭai darh dân te hi mihringin a hre thei em ni? A bûk zâr ri dur dur te hi?

³⁰Ngai teh, a vêlah a êng a theh darh a, Tuifinriat mawngte a khuh a.

³¹Hêng hian mite thu a rêlsak a, Ei tûr tam tak a pe a.

³²Kâwlphein a kutte chu a khuh a, A tum tak fuh tûrin a tîr ṭhîn a.

³³Khawpui ri chuan a chungchâng a puang a, Ran rualte pawhin thlipui lo thawkah chuan an puang a.