Read Mizo_Old_version Joba 37 Bible Online

Joba 37 - Mizo_Old_version bible

Joba 37

¹Hei vâng hian ka thinlung a khûr a, A phu hlawp hlawp asin.

²Ngaithla ngun ula, a awrâwl te leh A kâa lo chhuak rite chu.

³Vân pum pui hnuaiah a tîr chhuak a, A kâwlphe chu lei tâwp thleng thlengin.

⁴A hnuah chuan a awrâwl a chhuah a, A ropuina aw chu a tiri dur dur a; A aw an hriat pawhin a chawlhtîr chuang lo.

⁵Pathian chuan mak takin a aw a tiri dur dur a, Thil ropui tak, kan hriat phâk loh a ti a ni.

⁶Vûr hnênah chuan, “Leiah tla rawh,” a ti a, Chutiang bawk chuan ruah leh ruahpuite hnênah pawh.

⁷Mi tinrêng kut chu a tikhawng zo va, A mi siam zawng zawngten an hriat nân.

⁸Tichuan, ramsaten bîk bona an pan a, An bu zâwlah an awm reng a.

⁹Chhim lam pindan ata thli chhia a lo thawk a, Hmâr lam ata khaw vâwt.

¹⁰Pathian thaw vângin tuikhal a lo awm a, Tui zau tak pawh a khal zo va,

¹¹A ni, chhûm chhah puite chu hnâwngin a tikhat a, Chhûmah chuan kâwlphe a tidarh a.

¹²Ama hruaiin an vir zawr zawr a, Khawvêl chên theihna zawng chungah hian, A thupêk apiang an tih theih nân.

¹³Zilh nân emaw, a ram ṭhat nân emaw, Zahngaih vâng emawa a rawn awmtîr a ni.

¹⁴Joba, hei hi ngaichâng teh, Bengsikin Pathian thiltih makte chu ngaihtuah teh.

¹⁵Chûng chu Pathianin thu a pêk dân leh, A chhûma kâwl a phêttîr dânte i hria em ni?

¹⁶Chhûm a kân theih dân te, Hriatna famkim neitu thiltih makte hi i hria em ni?

¹⁷Chhim thli avânga lei a reh ṭhiapa, I silhfên a lo lumzia te hi?

¹⁸Ani chu vân i kaih pharhpui thei em ni? Dârthlalang chhûn khal ang maia khauh chu?

¹⁹A hnêna kan sawi tûr chu min hriattîr rawh le; Thimna avângin kan sawi thiam loh hi.

²⁰Ka sawi dâwn tih amah hrilh tûr em ni? Mahni intihboral miin a châk ngai em ni?

²¹Tûnah, thli a lo thâwta a chhêm kianin, Vân zâwla êng ropui chu miin an en ngam lo.

²²Hmâr aṭangin rangkachak êng a lo zâm a, Pathian chu ropui râpthlâk takin a inthuam a.

²³Engkimtitheia chu kan hmuchhuak thei lo va, Thiltihtheihna leh diknaah a ropui a, Felna a ngah a, a hnehchhiah lo vang.

²⁴Chuvângin, miten amah an ṭih a, Intifingte chu tu mah a pawisa chuang lo ve.