Read Mizo_Old_version Joba 38 Bible Online

Joba 38 - Mizo_Old_version bible

Joba 38

¹Tin, LALPA chuan ṭhâwngaleivir aṭangin Joba chu a chhâng a, heti hian a ti a:

²Hriatna tel lo thua Thurâwn tithimtu hi tu nge ni?

³Mipa takin i puan veng la, Thu ka zâwt ang chia, mi hrilh ang che.

⁴Leilung nghahchhan ka phûm lai khân khawiah nge i awm? I hriat thiam chuan sawi rawh.

⁵A len lam bî te tu nge thliah? I hre meuh maw! A nih leh, a chung zâwl tehna tu nge zam?

⁶A nghahchhan chu khawiah nge a din ngheha, Tu nge a kil lung phûm ni,

⁷Vârparh arsite an zai khâwma, Pathian fate zawng zawng an au lai khân?

⁸Tuipui chu chhûla a lo chhuah lai khân Tuin nge kawng lo khâr hnan?

⁹A silhfên atân chhûm ka siam a, A tuam puanah thim chhah tak;

¹⁰A chîm chin tûr te ka siam a, A danna leh khârna tûr te;

¹¹“Heti thleng chauh hian lo kal la, pêl hauh suh, Tah hian i fâwn vêl tâwp rawh se,” ka ti a ni.

¹²Lei khuhna tikianga, Mi suaksualte thing chhuak tûrin,

¹³I pian achinah, zîng hnênah thu i pein, Khawfîngchat hi a hmun tûr i hriattîr ngai em?

¹⁴Lei hi nemnaa hlum nem angin a tilang dang a, Silhfên ze hrang ang nukin a lang ta a.

¹⁵Mi suaksualte êng chu chhuhsak a ni a, An bân lek sân chu tihtliah a ni.

¹⁶Tuipui hnârahte i lût tawh ngai em? A thûkzia te i fang chhuak tawh em ni?

¹⁷Thihna kawngkate chu i hnênah tihlan a ni tawh em? Thihna daihlim kawngkâ chu i hmu tawh em ni?

¹⁸Lei zauzia te hi i hre phâk em ni? I hriat vek chuan sawi rawh.

¹⁹An ramri i hruai theiha, An in lam kawng chin i hriat theihna tûr chuan,

²⁰Êng chênna kawng chu khawiah nge? Thim pawh chu khawiah nge a hmun?

²¹I hria ang chu, chûngah chuan i piang tawh a, I ni te pawh a tam tawh alâwm!

²²Vûr dah khâwlna hmunah i lût tawhin, Rial dah khâwlna hmunah pawh i lût tawh em ni?

²³Buai hun atân te leh indo leh inbeih ni atâna ka khêk chu a ni.

²⁴Eng kawngin nge êng hi a ṭai darha, Chhak lam thli pawh hi lei chungah a intheh darh?

²⁵Tuin nge ruahpui tâna luankawr leh, Ṭêk tâna kawng siam -

²⁶Tu ma awm lohna leh mihring chên lohna Thlalêra ruah surtîr tûr te,

²⁷Ram ro leh pilril tihnâwng tûr te, Hlobet hring ṭotîr tûr tein?

²⁸Ruahin pa a nei em ni? Daifîmte hi tu hrin nge?

²⁹Tu chhûl aṭangin nge tuikhal hi a lo chhuah? Vân aṭanga vûr lo tla ṭhîn hi tu hrin nge?

³⁰Tuite pawh lung ang maiin a sak a, Tuipui thûk chungte a khal a.

³¹Siruk khi i phuar khâwm theiin, Chhohreivûng tlar khi i phelh darh thei em ni?

³²Arsite khi a hun bîah i hruai chhuak thei em ni? Zângkhuahote khi i hruai thei em ni?

³³Vân thil ruatte chu i hriain, Leiah hian thu i neihtîr thei em?

³⁴A nan tûr chein chhûm ata Ruahpuivânawn i au thla thei em ni?

³⁵Kâwlphê te chu i hnêna lo kala, “Heta hi kan awm,” ti tûrin i tîr chhuak thei em ni?

³⁶Tu nge chhûm dumahte khian finna daha, Tu nge arsi thlâwkte hriat thiamna pe?

³⁷Tu nge finnaa chhûmte hi chhiar theia, Vân tuithâwl tu nge leih baw thei?

³⁸Vaivutte a inhlâwm khâwma, Lei tlangte a inbelhbawm hi.

³⁹Sakeibaknei tân ei tûr i zawnsakin, Sakeibaknei vânglaite châk daih i pe thei em ni,

⁴⁰An pûkahte an bawha, Seh tûr an chân lai hian?

⁴¹Choâk hi, a note ei tûr tlachhama, Pathian hnêna an hrâm lai leh An vahvaih laiin tuin nge chaw pe?