Read Mizo_Old_version Joba 39 Bible Online

Joba 39 - Mizo_Old_version bible

Joba 39

¹Lung bang sathâr no neih hun i hria em ni? Sazuk no neih hun i chhinchhiah thei em ni?

²An pai chhûng thla zât i chhiarin, An hrin hun te i hria em ni?

³An bawk a, no an hring a, An vei zo mai a ni.

⁴An note chu an pian a tlang a, Rampalailêngah an ṭhang lian a, An kal darh a, an puite hnênah an kîr tawh lo.

⁵Ramsabengtung tuin nge se zâwl chhuah? Ramsabengtung chak thlunna tu phelh nge?

⁶An awm nân thlalêr ka ruatsak a, An chên nân ram ṭau.

⁷Khawpui hulûm chu a hmusit a, Khalhtu au ri a hre ngai lo.

⁸A tlatna chu tlâng dungah a ni a, Thil hring apiang a zawng chhuak ṭhîn.

⁹I tân selepa chu chhawr theih em ni ang? I ran inah a riak duh ang em?

¹⁰Lei lehnaah hrui i bahtîr thei ang em? I hnungah lei ruam a rawn chawk rual ang em ni?

¹¹A chak êm avâng maiin i ring thei dâwn em ni? I hna chu i kawltîr dâwn em ni?

¹²I buhte i hruih zâwla rawn dah khâwm tûrin I ring mai thei em ni?

¹³Ostrich thla uangthuang takin a inkhawng vêl a; Mahse, a thla ki leh a hmulte chu an ngilnei em ni?

¹⁴Leiah a tui a hnutchhiah a, Vaivutah a khuh lum a.

¹⁵Miin a rap keh thei a, Ramsaten an chil keh thei tih a hre leh tawh lo.

¹⁶Ama no ni lo ang hrimin a note lakah a inchhu ngawng a, A thiltih chu a thlâwn dâwn emaw, a pawisa chuang lo.

¹⁷Pathianin finna a haihchhamtîra, Hriat thiamna a pêk hek loh avângin.

¹⁸Tlân bo tuma a han insingsak meuh chuan, Sakawr leh a chung chuangte chu a tham lo mai.

¹⁹Sakawr chaknate hi i pêk em ni? A nghâwngah thahrui i bân em ni?

²⁰Khau anga kat tûrin i siam em ni? A hnâr tum dur dur hlauhawmzia te hi!

²¹Phai ruamah a ke a phiat tlut tlut a, A tha a so va, indo hriamhrei hmachhawn tûrin a chhuak a.

²²Hlauh rêng a hre lo va, a zâm ngai lo va, Khandaih lakah a tîm ngai hek lo.

²³A chungah thal bâwm a ri rawk rawk a, Fei leh thal a tle zawr zawr mai a.

²⁴Hlauhawm tak leh thinur takin a khawh puat puat a, Tawtawrâwt thâwmah a ding hle hle thei lo.

²⁵Tawtawrâwt a rîk phawt chuan “Chei! Chei!” a ti a, Inbeihna chu hla takah a rim a hria a, Hotute râwl leh inbeihna hawhaw nên.

²⁶I finna avângin mu chu a thlâwk chhovin, Chhim lamah thla a zâr em ni?

²⁷Muvanlai thlâwk chho leh, Sâng taka bu a chhep hi i thupêk em ni?

²⁸Khâm kovahte a chêng a, Lung tohlâwt hmun him takah a riak ṭhîn.

²⁹Chuta ṭang chuan ei tûr a bihthla a, A mit chuan hla tak a hmu.

³⁰A note pawhin thisen an dâwt a, Saruang awmnaah chuan a awm zêl a ni.