Read Mizo_Old_version Joba 4 Bible Online

Joba 4 - Mizo_Old_version bible

Joba 4

¹Tichuan, Elifaza, Temani mi chuan a chhâng a, heti hian a ti a:

²I hnênah thu kam khat sawi ila, i hua ang em? Mahse, ṭawng lovin tu nge insûm thei ang le?

³Ngai teh, mi tam tak i lo zirtîr a, Kut chak lote i tichak tawh a.

⁴I thuin tlute a tungding a, Khûp zâwite chu i tichak a.

⁵Tûnah i chungah a lo thleng ve ta a, i chau va, A han khawih chia, i buai ta a ni.

⁶I Pathian ṭih hi i rinchhan ber, I kawng ngîlna hi i beisei chhan a ni lo vem ni?

⁷Han ngaihtuah vang vang teh: pawi khawih lo tu nge boral? Khaw nge mi ngîl tihbovin an awm ngai?

⁸Keia hmuh dân chuan khawlohna lei leta, Buaina tuh chuan a ngai vêk an seng leh ṭhîn.

⁹Pathian thawah an boral ṭhîn a, A thinrimna chhêmin an ral ṭhîn.

¹⁰Sakeibaknei rûm te, sakeibaknei kawlh awrâwl te, Sakeibaknei vânglai ngho te a tliak e.

¹¹Sakeibaknei upa chu ei tûr chhamin a boral a, Sakeibakneipui no hruaite chu an darh e.

¹²A rûk têin ka hnênah thu a lo thleng a, Ka beng hian a phun ru ser ser chu a hria.

¹³Mi mut reh lai taka Zân inlârna chu ka ngaihtuah laiin,

¹⁴Hlauhna ka chungah a lo thleng a, khurhna nên, Ka ruh zawng zawng a tinghîng a.

¹⁵Tichuan, ka hmai hmaah thlarau a kal a, Ka hmulthi a ding sung sung.

¹⁶A ding a; mahse, a hmêl lan dân ka thlei thei lo; Rîruang zawng ka hmaah a awm ngei mai; A reh ṭhiap a; tin, aw ka hria a:

¹⁷Pathian hmaah mihring thi thei a fel tâwk em ni? A siamtu hmaah mihring a thianghlim tâwk em ni?

¹⁸Ngai rawh, a chhiahhlawhte pawh a ring zo lo va, A vântirhkohte pawh â a ti a ni a,

¹⁹Hlum ina chêngte chu a va ring lo zual dâwn êm, Vaivuta siam mai a ni a, Phêngphehlep anga awngrawp maite chu!

²⁰Zing leh tlai kârah an boral a, Tukhaw ngaihsak lohvin an ral zêl ṭhîn a ni.

²¹An chhûnga puan in thlunna hrui pawh chah a nihin An thi mai a ni lâwm ni, finna nei lovin?