Read Mizo_Old_version Joba 40 Bible Online

Joba 40 - Mizo_Old_version bible

Joba 40

¹Tin, LALPA chuan Joba hnênah a sawi zêl a:

²Sawisêltu chuan Engkimtitheia chu a hnial ang maw? Pathian hnialtu chuan chhâng ang hmiang! tiin.

³Tichuan, Joba chuan LALPA chu a chhâng a:

⁴Ngai teh, kei mi pawimawh tham lo tê hian Engtin nge ka chhân ang che? Ka kâ ka hup mai a ni.

⁵Vawi khat ka sawi tawh a, ka chhâng tawh lo vang che; A ni, vawi hnih; ka chhunzawm tawh lo vang, a ti a.

⁶Tin, LALPA chuan Joba chu ṭhâwngaleivir aṭangin heti hian a chhâng a:

⁷Mipa takin i puan veng la, Thu ka zâwt ang chia, mi hrilh ang che.

⁸Ka thurêlte mi sûtsak dâwn em ni? Thiam i chan theih nân Thiam loh mi chantîr dâwn em ni?

⁹Pathian bân ang i nei em ni? Amah angin khawpui ri aw i chhuah thei em ni?

¹⁰Lalna leh zahawmna han inbel la, Chawimawina leh ropuinain inthuam rawh khai.

¹¹I thinrimna khat liam chu leih chhuak la, Mi chapo apiang chu en bîkin titlâwm teh khai.

¹²Mi chapo apiang chu en bîkin tihniam la, Mi suaksualte chu an dinhmunah rap bet rawh le.

¹³Vaivutah phûm hlawm la, Hmun birûah an hmêlte phuar khâwm teh le.

¹⁴Tichuan, i kut ding lam ngeiin a chhanhim thei che tih Kei ngei hian ka hria ang chu.

¹⁵En teh, nangmah ang bawka Behemoth ka siam hi, Bâwng anga hnim ring mi a ni.

¹⁶Ngai teh mah, a chakna chu a kâwngah a awm a, A thahrui chu a dul thuara awm a ni.

¹⁷Sidar angin a mei a tikhauh va, A malpui thâte chu a phiar tlat mai.

¹⁸A ruhte chu ngên kawrawng ang a ni a, A fuke chu thîr tlâwn ang a ni.

¹⁹Pathian siam u ber a ni a, A siamtu chuan a tân khandaih a siamsak a.

²⁰Tlângte chuan chaw an chhuahsak ṭhîn a, Chu chu ramsa zawng zawng tualchaina a ni.

²¹Lotus buk hnuaiahte a bawk a, Pumphîr hnuai leh dûmahte pawh.

²²Lotus buk chuan a zâr hlim a, Luia tuipuisuthlah chuan a hual vêl a.

²³Ngai rawh, tui a lo len buan buan pawhin a hlau ngai lo; A kâ thleng pawhin Jordan lian mah se, a zuam zêl.

²⁴A inrâlrin laiin miin an man thei em ni? A hnârah an thil thei ang em ni?