Read Mizo_Old_version Joba 41 Bible Online

Joba 41 - Mizo_Old_version bible

Joba 41

¹Nghakuaiin leviathan i hnûk chhuak thei em ni? Hruihrualin a lei i phuar bet thei em ni?

²Phairuang hruiin a hnârah i thil thei em ni? Nghakuaiin a khabe i thil tlang thei em ni?

³I hnênah dîlna tam tak a siam ang em ni? I hnênah thu nêmin a sawi ang maw?

⁴Kumkhuaa rawngbâwltua i hman tûrin I hnênah thuthlung a siam ang em ni?

⁵Sava ang lekin i khâl thei dâwn em ni? I hmeichhiate kaih atân i hlîng thei ang maw?

⁶Sangha mantuhoten indâwr nân an hmang ang em ni? Sumdâwng mite zîngah an sem darh ang em ni?

⁷A vun khatin thîr hlîngte, A lûah nghafei te i riah thei em ni?

⁸A chungah kut han thlâk teh, In inbeih dân tûr chu ngaihtuah rawh, I ti leh tawh ngai lo vang!

⁹Ngai rawh, mihring beiseina chu a thlâwn a ni; A hmuh mai pawhin a beidawng nghâl a ni.

¹⁰Amah chawk tho tûrin tu mah an rorum ngam lo. Chuti a nih chuan tu nge ka hmaah ding thei ang?

¹¹Tu nge ka rulh leh tûra thil mi pe hmasa awm? Vân hnuaia thil engkim hi ka ta a ni.

¹²A fuke thu-ah ka ngawi reng lo vang a, A thahrui chakzia leh a taksa inphut tâwkziaahte pawh.

¹³Tu nge a vun pâwnlâng chu hlîp thei ang? A khabe thuah hnih chhûngah tu nge lût thei ang?

¹⁴Tuin nge a hmêl kawngkapui chu hawng thei ang? A ha kual vêl chu ṭihbaiawm tak a ni.

¹⁵A vun châr chu a chhuan ber a ni a, Châr ang maia phui tlat a ni.

¹⁶A insîk phui chiah avângin, A kârah boruak pawh a lût thei lo.

¹⁷An inzawm ṭheuh va, an inphan tlat avângin Kaih ṭheh theih a ni lo.

¹⁸A thaw chhuak chu a vâr sung sung a, A mitte chu khawfîngchat ang ru mai a ni.

¹⁹A kâ aṭangin meialh a chhuak a, Meisîte a ṭêk ur ur a.

²⁰A hnâr aṭangin meikhu a lo chhuak a, Sa so bêl nghawr leh phairuang mût ang vut vutin.

²¹A thaw te chuan meihawl a tivâm a, A ka aṭangin meialh a chhuak a.

²²A nghâwngah chakna a awm a, A hmaah ṭihbaiawmna a tualchai reng a.

²³A ṭâng chhûng vun pawh khing rût, Taksa nên inbelhbawm tlat, khawih chêt rual loh a ni.

²⁴A thinlung chu lung anga sak a ni a, A ni, râwt sawmna lung hnuai zâwk ang mai a ni.

²⁵Amah a lo thawh chhuah meuh chuan Pasalṭhate pawhin an hlau va, An thlaphângin mahni pawh an inhre tawh ṭhîn lo.

²⁶Miin khandaihin bei mah sela, a hneh lo vang; Fei emaw, thal emaw, feiṭam emaw pawhin.

²⁷Thîrte chu buhpâwl ang lekah a ngai a, Ngên chu thing mawih angah.

²⁸Thalin a titlânchhe lo va, A lakah chuan virvawmte chu pâwl bul ang lek a ni.

²⁹Talhtumte chu pâwl bul ang lekah a ngai a, Feiṭam vung te chu a nuihsan mai a ni.

³⁰A hnuai lampangte pawh lampei hriam tak ang a ni a; Diakahte chuan buhchîl khâwl ang maiin a bawk a.

³¹Tui thûk tak chu bêl angin a tiso buah buah a, Tuipui chu hlo bûr ang lekah a siam a.

³²A kalna hnu chu a êng ruak a, Miin tuipui chu vâr buahin an hmu ṭhîn.

³³Lei chungah hian amah ang rêng an awm lo ve, Hlauh nei hauh lova siam chu.

³⁴Thil sâng apiang a en ṭhîn a, Inlulingte zînga a ber a ni.