Read Mizo_Old_version Joba 42 Bible Online

Joba 42 - Mizo_Old_version bible

Joba 42

¹Tin, Joba chuan LALPA chu a chhâng a:

²“Engkim i ti thei tih ka hria e, I tum dâl rual eng mah a awm lo.

³‘Tu a ni nge, hriatna lova thurâwn thup botu hi?’ Chu vâng alâwm ka hriat thiam lohte, Ka tâna mak lutuk, ka hriat loh thilte ka sawi ni.

⁴‘Ngaithla rawh le, ka han sawi ang e; Thu ka zâwt ang chia, mi hrilh ang che.’

⁵Benga hriatna mai zawngin ka hre tawh chia; Mahse, tûnah zawng ka hmu ta che.

⁶Chu vâng tak chuan ka inten a, Vut leh vaivuta ṭhuin ka sim ta e,” tiin.

⁷Tin, LALPAN Joba hnênah hêng thute a sawi hnu hian LALPA chuan Elifaza, Temani mi hnênah chuan, “I chungah leh i ṭhian pahnihte chungah khân ka thinurna a nasa a ni, ka chhiahhlawh Joba angin ka chungchâng thu dik takin in sawi si lo.

⁸Chutichuan, tûnah bawngpa pasarih leh berâmpa pasarih kengin ka chhiahhlawh Joba hnênah va kal ula, in tân hâlral inthawi va hlân rawh u; tin, ka chhiahhlawh Joba chuan a ṭawngṭaisak ang che u a, chu chu ka lo pawm ang a, in âtzia ang zêl chuan ka ti lo vang che u; ka chhiahhlawh Joba angin ka chungchâng thu dik takin in sawi si lo va,” a ti a.

⁹Chutichuan, Temani mi Elifaza leh Suhi mi Bildada leh Naamathi mi Zofara-te chu an va kal a, LALPAN thu a pêk ang zêl chuan an ti a; tin, LALPA chuan Joba dîlna chu a pawm ta a.

¹⁰Tin, Joba chuan a ṭhiante pathum tâna a ṭawngṭai chuan, LALPAN Joba chan chu a tiṭha leh ta a; LALPA chuan Joba chu a hmaa a neih lêt hnih a pe leh ta a.

¹¹Tichuan, a unau leh a farnu zawng zawngte leh, tûn hmaa a hmêlhriat zawng zawngte chu a hnênah an lo kal a, a inah chuan chawhlui te an kîl a; LALPAN a chunga thil ṭha lo a thlentîr zawng zawng thu-ah chuan an tuarpui a, an thlamuan a; mi tinin a hnênah chuan tangkaraw tlangte leh rangkachak zungbunte an pe ṭheuh va.

¹²Chutichuan, LALPA chuan Joba hun hnuhnûng chu a tîr aia nasa takin mal a sâwm a; berâm sîngkhat leh sângli, sanghâwngsei sângruk, sebâwng tuak sângkhat leh sabengtungpui sângkhat a nei a.

¹³Fapa pasarih leh fanu pathum a nei bawk a.

¹⁴Tin, a hmasa bera hmingah chuan Jemimai a sa a, pahnihna hmingah chuan Keziai, pathumna chu Keren-hapuki.

¹⁵Tin, ram zawng zawngah pawh Joba fanute anga hmeichhe hmêlṭha an awm lo; an pa chuan anni chu an nuṭate zîngah ro chan tûr a pe ve hlawm a.

¹⁶Tin, hetih hun hian Joba chu kum za leh kum sawmli a dam a, a fapate, a fapaa fapate, chhuan li thlengin a hmu a.

¹⁷Chutichuan, Joba chu tar tak, khûpbihin a thi ta a.