Read Mizo_Old_version Joba 5 Bible Online

Joba 5 - Mizo_Old_version bible

Joba 5

¹Han ko teh, chhâng tûr che an awm teh rêng emaw? Mi thianghlim tu lam ber nge i hawi dâwn?

²Vuina hian mi â a tihlum thei a, Itsîknain mi mâwl a that thei.

³Mi â tak zung kai ka hmu a; Mahse, a chênna chu ânchhia ka lawh nghâl a.

⁴A fate chu an him awzâwng lo, Kulh kawngka bulah chuan chîl thlûkin an awm a, Chhanchhuaktu tûr lah an awm hek lo.

⁵A buh thar tûr rilṭâmten an ei zo va, Hlîng kâr ata pawh an la a, A neih zawng zawng chu tuihâlten an hap zo va.

⁶Tuarna hi vaivut ata lo chhuak a ni lo va, Buaina pawh hi lei aṭanga lo ṭo chhuak a ni hek lo;

⁷Buai tûrin mihring hi a lo piang a ni zâwk, Mei si chung lamah a chho angin.

⁸Kei zawngin Pathian lam ka zawng ang a, Pathian hnênah ka chungthu ka kawltîr ang -

⁹Thil ropui tak zawn chhuah rual lohte, Thil mak tak mai chhiar sên lohte titu chu.

¹⁰Ani chuan lei chungah ruah a rawn sûrtîr a, Lo chungah tui a rawn luantîr a.

¹¹Mi tlâwmte chu a chawisâng a, Lusûnte chu himnaah a dah chho va,

¹²Mi fingte remruat a phet chhia a, An kutin an tum a puitlin lo.

¹³Mi fingte chu anmahni fin vervêknain a âwk a, Mi vervêk remruat chu theh thlâk dêr a ni.

¹⁴Chhûn êngah thim an tâwk a, Chhûnlaiah zân angin an dap ṭhîn.

¹⁵An kâa khandaih lak ata retheite a chhanchhuak a, Mi chak kut ata tlachhamte pawh.

¹⁶Chutichuan, retheite chuan beisei an nei a, Khawlohnain a ka a chîp a.

¹⁷Ngai rawh, Pathianin mi a thunun chu a eng a thâwl e; Chuvângin, Engkimtitheia thununna chu ngainêp suh.

¹⁸Ani chuan a tina a, a tuam leh a, A tihliam a, kutin a tidam leh a ni.

¹⁹Buaina parukah a chhanchhuak ang chia, A ni, pasarihah, thil ṭha lo rêng rêngin a khawih lo vang che.

²⁰Ṭâm tlâkin thihna ata a tlan ang chia, Indonaah chuan khandaih thiltihtheihna lak ata.

²¹Ṭawngkam ṭha lo lakah thup i ni ang a, Chhiatna a lo thlen pawhin i hlau lo vang.

²²Chhiatna leh ṭâm chu i nuihsan ang a, Leia sakawlhte i hlau hek lo vang.

²³Rama lungte chu i thurualpui dâwn si a, Rama sakawlhte chuan an rem ang che.

²⁴Tin, i puan in chu a râlmuang tih i hria ang a, I huang chu i tlawh ang a, kim lo eng mah a awm lo vang.

²⁵I thlahte chu tam tak an ni ang a, I rîla rahte chu leia hlobet zât an ni tih i hria ang.

²⁶Kum tling takin i thlân i thleng ang a, A hun têa buhphal têl khâwm tâk ang mai hian.

²⁷En teh, kan chhui chhuah tâk hi, heti ngei hi a ni; Ngaithla la, i tâna ṭha tûrin hre rawh.