Read Mizo_Old_version Joba 6 Bible Online

Joba 6 - Mizo_Old_version bible

Joba 6

¹Tichuan, Joba chuan a chhâng a, heti hian a ti a:

²Aw, ka manganna hi bûk ni teh sela, Ka vânduaina hi bûknaah dah ni teh sela!

³Tuipui ṭiau aiin a rit dâwn si; Chu vâng chuan ka thu a bung a ni.

⁴Engkimtitheia thal ka chhûngah a awm si a, A tûr chu ka thlarauvin a in zo va; Pathian ṭihbaiawmna chuan mi ep a.

⁵Ramsabengtungin hlobet a peh laiin a hrâm em ni? Bâwngpa pawh a buhpâwl chungah a bû em ni?

⁶Tuina nei lo chu chi tel lovin a ei theih em ni? Artui pâwnvâr pawh hian hânna a nei em ni?

⁷Ka nunna hian khawih pawh a duh lo ve, Ka tân ei tûr tenawm tak ang a ni.

⁸Aw, ka dîl chu hmu thei teh ila! Pathianin ka thil châk chu mi pe teh se!

⁹Pathianin mi râwt sawm mai duh teh se! A kut lekin mi tan chhum mai teh sela!

¹⁰Chuti pawhin thlamuanna ka la nei cheu, A ni, ka lâwm cheu vang, natna thlah loh chung pawhin, Mi thianghlima thu chu ka phat loh avângin.

¹¹Ka chakna hi eng nge ni a, ka han nghah rengna tûr chu? Ka tâwpna eng nge ni a, ka han dawh rengna tûr chu?

¹²Ka chakna hi lung chakna em ni? Ka tisa pawh hi dâr em ni?

¹³Tha han so tûr rêng ka nei lo va, Keimahah sâwm khâwm tûr rêng a awm lo.

¹⁴Chau ṭêp tawh chungah chuan a ṭhian a ngilnei tûr a ni a, Engkimtitheia ṭihna hawisantu chungah pawh.

¹⁵Ka unaute chu kawrte rum anga bum hmang an ni a, Kawrte tui relhru ang mai hi;

¹⁶Tui khal avânga lo duma, Vûr inthup ṭhinna chu.

¹⁷A lum hun chuan an kang thîn a, A lo sat chuan an hmun ata an bo ṭhîn.

¹⁸Sumdâwng rualte chuan an kawng an rawn pênsan a, Ram rovah an lût a, an boral a.

¹⁹Tema sumdâwng rualte chuan an en a, Seba khualzinte chuan an beisei a.

²⁰An beisei tak a, an hlawhchham a, An va kal a, an hrilhhai a.

²¹Ka chungah chutiang chauh chu in ni, Ka chhiat tawh in hmu a, in hlau va.

²²“Mi pe teh u,” emaw, “In sum in pai mi hlân teh u,” emaw,

²³“Hmêlma kut ata mi chhanchhuak teh u,” emaw, “Hnehchhiahtute kut ata mi tlan teh u,” emaw ka ti em ni?

²⁴Mi zirtîr ula, ka ngawi ang e; Ka bona lai mi hriattîr rawh u.

²⁵Thu dik chu a chak êm êm! Mahse, in thu hian eng nge a thawh?

²⁶Ṭawng mai mai hi zilh in tum em ni? Mi mangang ṭawng hi thli ang mai a ni.

²⁷A ni, pa nei lo chungah ṭhum in vâwr duh a, Sumdâwn nân in ṭhian in hmang a.

²⁸Tûnah mi en teh mah u, In hmai hmaah ka daw hauh lo vang.

²⁹Inlamlêt ula, mi dem mai teh suh u, Inlamlêt ula, ka thu hi rêl fel a la ni hlei nêm.

³⁰Ka leiah dik lohna a awm em ni? Thil ṭha lo chu a thlei thei lo vem ni?