Read Mizo_Old_version Joba 9 Bible Online

Joba 9 - Mizo_Old_version bible

Joba 9

¹Tichuan, Joba chuan a chhâng a, heti hian a ti a:

²Chuti a nih zawng dik takin ka hria; Mahse, engtin nge Pathian hmaah mi a fel theih ang?

³Amah hnialkalh duh ang se, Vawi sângah vawi khat pawh a chhâng thei lo vang.

⁴Thinlunga fing, chaknaa engkim ti thei, A laka inchhungawng tu nge hmuingîl?

⁵Tlângte a sawn a, an hre lo va, A thinrima a tihdanglam lai khân.

⁶Lei a hmunah a sawi nghîng a, A bante chu a nghîng dur dur a.

⁷Ni thu a pe a, a chhuak lo va, Arsite pawh chu a khârkhip a.

⁸Mahni chauhva vân tipharhtu leh Tuipui fâwn chunga kal chu.

⁹Zângkhua te, Chhohreivûng te, Siruk te siamtu, Chhim lam pindante siamtu chu.

¹⁰Thil ropui chhui chhuah rual loh te, A ni, thil mak tak chhiar sên rual loh titu chu.

¹¹Ngai teh, ka bulah a kal a, ka hmu si lo; A tlang ta zêl a, ka hre si lo.

¹²Ngai teh, a la mai a, tu nge khap thei? Eng nge i tih, tu nge ti ang le?

¹³Pathianin a thinrimna a sûm lo vang a, Rahab puitute a hnuaiah an kûn a.

¹⁴Kei tehlulin engtin nge ani chu ka chhân ang a, Amah hnial nân thu eng nge ka thlan chhuah ang?

¹⁵Dik mah ila, ani zawng ka chhâng lo vang, Ka khinna chu ka dîl zâwk ang.

¹⁶Ko ila, ani chuan mi chhâng sela, Ka thu a dawnsawn ka ring chuang lo.

¹⁷Thlipuiin mi tichhia a, Chhan awm lovin ka hliamte mi belhchhah a,

¹⁸Thâwk ka lâk pawh mi phalsak lo va, Hrehawmin mi tikhat a.

¹⁹Chakna thu-ah chuan, en teh, Chaka chu, Rorêlna lam thu-ah ani chu tu nge khâwm ang?

²⁰Dik mah ila, ka kâ hian thiam loh mi chantîr ang. Demawm lo mah ila, mi chantîr ang.

²¹Demawm lo ka ni, ka inngaisâng lo; Ka nun hi ka hmusit a ni.

²²A thuhmun vek mai; chu vâng alâwm, Ṭha famkim pawh, suaksual pawh a tichhia, ka tih ni.

²³Chhiatnain thihna a thlen thut chuan, Mi nun tlang tuarna chu a nuihzat ang.

²⁴Lei hi mi suaksual kutah pêk a ni a. A rorêltute hmai a khuha, Amah a nih loh chuan tu dang nge ni ang?

²⁵Ka hunte hi zualko tlân aiin an chak a, An thlâwk bo va, thil ṭha rêng an hmu lo.

²⁶An kal liam a, lawng chak tak angin, Mupui tum nei bir angin.

²⁷Ka vuina hi ka theihnghilh ang a, Ka lungngai hmêl hi ka dah bo vang a, Ka intihlim ang, ka tihin,

²⁸Ka lungngaihna zawng zawng hi ka hlau va, Nangin mi tlangah mi ngai lo vang tih ka hria.

²⁹Thiam loh chang tûr ka ni a, Eng nge sâwt lo tûra ka ṭan tehchiam ang?

³⁰Vûrin inbual mah ila, Ka kutte chingalin sil mah ila,

³¹Khuarkhurumah mi hnim tho vang a, Ka silhfênte ngei pawhin mi ten ang.

³²Rorêlna hmaa ding dûna ka chhân tûrin, Ani chu kei anga mihring a ni si lo.

³³Kan chunga kut nghat ve ve tûr, Kan kâra thu titlutu rêng an awm lo.

³⁴Ka lak ata a tiang la bo sela, A ṭihbaiawmnain mi tihlau suh se.

³⁵Tichuan, amah hlau lovin ka ṭawng ang, Mahni chuan chutiang ka ni si lo.