Read Mizo_Old_version Sam 10 Bible Online

Sam 10 - Mizo_Old_version bible

Sam 10

¹Aw LALPA, engati nge hla taka i din ṭhin le? Engati nge mangan laitea i inthup ṭhin le?

²Mi suaksualte chapona avângin mi retheite chu ûm nekin an awm ṭhîn; An thil sual ngaihtuah chhuahahte chuan anmahni ngei âwk rawh se.

³Mi suaksual chuan a thinlung duh zâwng a chhuang a, Mi duhâm chuan LALPA chu a paih thla a, a hmusit ṭhîn.

⁴Mi suaksual chuan chapo hmêl puin, “A phût lo vang,” a ti ṭhîn. A ngaihtuahna zawng zawng chu, “Pathian rêng a awm lo,” tih hlîr a ni.

⁵A awm dânte chu eng lai pawhin a nghet reng a; I rorêlnate chu chung lam hla takah, a hmuh phâk lohvah a awm daih a; Amah dotute zawng zawng lah chu a nuihsan mai ṭhîn.

⁶A rilru chuan, “Ka nghîng lo vang; Chhuan zawng zawng thlengin mangangin ka awm lo vang,” a ti a.

⁷A kâ chu ânchhe lawhna te, tihderna te, tihduhdahna tein a khat a; A lei hnuaiah chuan thil tihsualna leh khawlohna a awm.

⁸Khaw tina chân rûkna hmunahte a ṭhu ṭhîn a; Hmun fianrialahte chuan pawi khawih lo mite a that ṭhîn; A mitin eng mah ti thei lo mi chu a châng ru reng ṭhîn a ni.

⁹Sakeibakneiin a pûka a châng ru angin, ani chuan fianrialah a châng ru reng ṭhîn a; Mi rethei man tûrin a châng ṭhîn a; Mi rethei chu a man ngei a; Tichuan, a lênin a hnûk bo ṭhîn.

¹⁰A bawk pêr a, a kûn a, Eng mah ti thei lo mite chu a mi chakte tihtlûkin an awm ṭhîn.

¹¹A rilru chuan, “Pathianin a theihnghilh a ni; A hmai chu a thup a; eng tikah mah a hmu lo vang,” a ti ṭhîn a.

¹²Aw LALPA, tho la; Aw Pathian, i kut han lek teh! Mi retheite chu theihnghilh suh ang che.

¹³Eng vângin nge mi suaksual chuan Pathian a hmuhsita, A rilruin, “I phût lo vang,” a tih ṭhin ni?

¹⁴Hmuh chu i hmu tawh reng a; i kuta thungrûl tûrin thil tihsual leh tihvuina i en reng si a; Eng mah ti thei lo mi chu i hnênah a inkawltîr ṭhîn a: Pa nei lo ṭanpuitu i nih ṭhin kha.

¹⁵Mi suaksual bân chu titliak la; Mi sual chu a suahsualna zawng chhuak ang che, I hmuh loh ṭhuai hma loh chuan.

¹⁶ LALPA chu kumkhaw tlaitluan atâna Lalber a ni a: Hnam tin chu ama ram ata an boral ta.

¹⁷ LALPA, leia mi chu hlauhawm taka a awm leh tawh lohna tûrin, Pa nei lo leh hnehchhiahna tuarte rorêlsak nân, Thuhnuairawlhte duh zâwng chu i ngaithla tawh a; An thinlung chu i buatsaih ang a, i beng chu i ngaihthlâktîr ang.