Read Mizo_Old_version Sam 102 Bible Online

Sam 102 - Mizo_Old_version bible

Sam 102

¹Aw LALPA, ka ṭawngṭaina hi ngaithla la, Ka au thâwm hi i hnên thleng rawh se.

²Ka mangan niah ka lakah hian i hmai thup suh la; Ka lamah hian i beng rawn dawh la; Ka koh hun che chuan mi chhâng thuai ang che.

³Ka dam chhûng nite hi meikhu angin a zâm ral a, Ka ruhte hi thingthu nung angin a sâ a.

⁴Ka thinlung hi hlobet anga em hlumin a awm a, a vuai zo ta; Chaw ei pawh ka theihnghilh si a.

⁵Ka rûm thâwm avângin ka ruhte hi ka tisaah a bet tlat a ni.

⁶Thlalêr tuivalawng ang ka ni a; Khaw ram chhimbuk ang mai ka lo ni ta.

⁷Ka meng reng a, Chawngzawng, in chunga amah chauhva awm ang ka lo ni ta.

⁸Mi dotute chuan nilêngin mi sawichhe ṭhîn a; Ka chunga kawlhte chuan keimah anga awm tûrin ânchhia an lawh ṭhîn.

⁹Vut hi chaw angin ka ei a, Ka in tûr chu mittui nên ka pawlh ta si a.

¹⁰I lungnih loh êm êm leh i thinur avângin, Nangin mi la kâng a, mi paih bo ta si a.

¹¹Ka dam chhûng nite hi hlim ral lam tung tawh ang a ni a; Hlobet angin ka vuai ta.

¹²Aw LALPA, nang erawh chu kumkhuain i awm ang a; Nangmah hriat rengna pawh chhuan zawng zawng thlengin a awm bawk ang.

¹³I tho vang a, Zion tlâng chu i khawngaih ang; Ani chu khawngaih a hun tawh si a, a ni, hun ruat chu a thleng ta.

¹⁴I chhiahhlawhte chuan a lungte chu an ngainain, A vaivut pawh an khawngaih si a.

¹⁵Chutichuan, hnam tinin LALPA hming chu an ṭih ang a, Leia lal zawng zawng chuan i ropuina chu an ṭih bawk ang.

¹⁶ LALPA chuan Zion khua chu a din leh ta si a, A ropuinaa inthuamin a lang ta a;

¹⁷Pachhiate ṭawngṭaina chu a ngaihsak a, An ṭawngṭaina chu a hmusit lo.

¹⁸Chu chu ṭhangthar lo la awm tûr tân chuan ziak a ni ang a, Siama lo la awm tûr hnam chuan LALPA chu an fak ang.

¹⁹Ani chuan a hmun thianghlim sâng tak aṭangin a zuk en a; LALPA chuan vân aṭang khian lei hi a hmu a;

²⁰Mi tâng rûm chu ngaithla tûr leh, Thi tûra ruatte chu phelh tûrin;

²¹ LALPA rawngbâwl tûra mi tin leh ram tin an inkhâwm huna, Miten LALPA hming chu Zion khuaa an hril theiha, A fakna thu chu Jerusalem khuaa an hril theih nân.

²³Ani chuan kawnglakah hian ka tha a tiṭhum a; Ka dam chhûng hi a titawi a.

²⁴“Aw ka Pathian, ka vânglai niahte hian mi la bo suh ang che,” ka ti a; Nanga kumte chu chhuan awm chhûng zawng zawngin a awm ang.

²⁵Leilung nghahchhan chu hmasânga i phûm tawh a ni a; Vânte pawh i kutchhuak a ni.

²⁶Chûngte chu a la boral ang a, nang erawh chu i awm reng ang: A ni, chûng zawng zawngte chu silhfên angin a la hlui ang a; Puan angin i thlâk ang a, a lo danglam tawh ang;

²⁷Nang erawh chu i pângngai fo va, I kumte chuan ral ni rêng a nei lo vang.

²⁸I chhiahhlawhte fate chu an awm reng ang a, An thlahte chu i hmaah tihnghehin an awm ang.