Read Mizo_Old_version Sam 103 Bible Online

Sam 103 - Mizo_Old_version bible

Sam 103

¹Aw ka nunna, LALPA chu fak la; Ka kawchhûnga awm zawng zawngte u, a hming thianghlim chu fak rawh u.

²Aw ka nunna, LALPA chu fak la, A thiltih ṭhat zawng zawng chu theihnghilh suh.

³Ani chuan i khawlohna zawng zawng a ngaidam ṭhîn a; I natna zawng zawng a tidam ṭhîn a;

⁴Boralna lak ata i nun chu a tlan ṭhîn a; Ngilneihna leh lainatnate a khumtîr ṭhîn chia;

⁵I kâ chu thil ṭhain a titlai ṭhîn a; Chutichuan, i tleirâwlna chu mupui anga siam tharin a awm leh ṭhîn.

⁶ LALPA chuan hnehchhiahna tuar zawng zawngte tân, Thil felte tihsakin, rote a rêlsak ṭhîn.

⁷A kawngte chu Mosia a hriattîr a, A thiltihte chu Israela thlahte a hriattîr bawk a.

⁸ LALPA chu lainatnaa khat, mi khawngaih thei tak, Thinnel tak, ngilneihna ngah tak a ni.

⁹Ani chuan a hau fo lo vang a; A thinur chu a pai kumkhua hek lo vang.

¹⁰Kan sualnate angin kan chungah a ti lo va, Kan khawlohnate angin min thungrûl hek lo.

¹¹Vân khi lei chung sâng taka a awm angin, Amah ṭihtute chunga a ngilneihna chu a nasa a ni.

¹²Chhak leh thlang a inhlat ang hian, Kan bawhchhiatnate chu kan hnên ata a dah sawn ta daih a.

¹³Pain a fate a khawngaih ang hian, LALPA chuan amah ṭihtute chu a khawngaih ṭhîn.

¹⁴Kan taksa siam dân hi a hriata, Vaivut mai kan ni tih a hriat reng avângin.

¹⁵Mihring zawng, a dam chhûng nite chu hlobet ang a ni a; Phûl pangpâr ang hian a vul ṭhîn a.

¹⁶Thliin a chhêm a, a bo ṭhîn a ni, A awmna chuan a hre leh tawh lo vang.

¹⁷ LALPA ngilneihna erawh chu amah ṭihtute chungah chuan chatuan ata chatuan thlengin a awm ang a, A felna pawh an tuchhuan thlengin a awm ang;

¹⁸A thuthlun zâwm apiangte leh, A thuhrilhte awih tuma hre reng apiangte chungah chuan.

¹⁹ LALPA chuan a lalṭhutphah chu vânahte khian a tinghet a; A ram chuan engkim chungah ro a rêl a.

²⁰A vântirhkohte u, a thu ngaithlaa a thu zâwm ṭhîn, chaknaa ropuite u, LALPA chu fak rawh u.

²¹A sipaihote u, a duh zâwng ti ṭhîn, a rawngbâwltute u, LALPA chu fak rawh u.

²²A rorêlna hmun zawng zawnga a thiltih zawng zawngte u, LALPA chu fak rawh u; Aw ka nunna, LALPA chu fak rawh.