Read Mizo_Old_version Sam 104 Bible Online

Sam 104 - Mizo_Old_version bible

Sam 104

¹Aw ka nunna, LALPA chu fak rawh. Aw LALPA ka Pathian, nang chu i ropui êm êm a, Chawimawina leh ropuinain i inthuam a.

²Nang chuan êng chu puan angin i inbel a; Vânte khi puan in chung angin i kai pharh a.

³Ani chuan a pindan chungnung kalkhangte chu tuiahte khian a khang a, Chhûmte khi a tawlailîrah a siam a; Thli thla chungahte chuan a lêng a.

⁴A vântirhkohte chu thli-ahte a chantîr a; A rawngbâwltute chu meialh dur durah a chantîr ṭhîn.

⁵Leilung nghahchhante chu a phûm a, Kumkhuaa a nghîn loh nân.

⁶Nang chuan leilung hi tui thûk tak chu puan angin i sintîr a; Tuite chu tlâng chungahte chuan a awm po va.

⁷I zilhhauna avâng chuan a tlân bo va; I khawpui ri thâwm avâng chuan a kal bo ta thuai a;

⁸Tlângahte a chho va, kawrahte a chhuk a, A tân hmun i buatsaih lamah chuan.

⁹A pelh loh tûrin ri i kham a; Lei chîm pil tûra a lêt leh tawh lohna tûrin.

¹⁰Ani chuan kawrahte chuan tuihnate a tîr chhuak a; Tlâng kârahte chuan a luang a.

¹¹Chûngte chuan ramsa tinrêngte in tûr a pe ṭhîn a; Ramsabengtungte chuan an tuihâl an tireh ṭhîn.

¹²A kamahte chuan chunglêng savaten awmna an nei ṭhîn a, Thingbuk zîngahte chuan an hrâm ṭhîn.

¹³Ani chuan a pindan chungnung aṭang te khian tlângte chu tuiin a châwm ṭhîn a, Lei hi i thiltih rahtein a tlai ṭhîn.

¹⁴Hlobet chu rante tân a ṭotîr ṭhîn a, Thlai chu mihring hmanah a ṭotîr bawk ṭhîn; Lei aṭangin ei tûr a chhuahtîr theih nân.

¹⁵Mihring thinlung tihlâwmna uain nên, A hmai tihmawmna tûr hriak nên, Mihring thinlung tihchakna chhang nên.

¹⁶ LALPA thingte chu a tlai ṭhîn, Lebanon tlânga sidar thing a phunate chu.

¹⁷Chutah chuan savaten bu an chhep ṭhîn, Vacha erawh chu fâr thingte chu a in a ni.

¹⁸Tlâng sângte chu sathâr tân a ni a, Lungpuite chu sazupui tân inhumhimna a ni.

¹⁹Ani chuan thla khi hunbi hriat nân a ruat a, Ni khian a tlâk hun chu a hre ṭhîn.

²⁰Nang chuan thim i siam a, zân a lo ni ṭhîn a; Chumi hunah chuan ramhnuaia sa tinrêngte chu an tla chhuak ṭhîn.

²¹Sakeibaknei vânglaite chuan an sa seh tûr chu hâhum zuiin, Pathian hnên ata an ei tûr an zawng ṭhîn.

²²Ni a chhuak a, an kal bo va, An awmna pûk ṭheuhvahte chuan an mu ṭhîn a.

²³Mihring chu hna thawkin a chhuak a, Tlai lam thlengin a thawk rim ṭhîn.

²⁴Aw LALPA, i thiltihte chu a va tam êm! Finnain i siam vek a ni: Leilung hi i hausaknain a khat a nih hi.

²⁵Sawta saw tuifinriat a awm, nasa tak, zau tak mai chu, Sawmiah sâwn thil bawkvâka kal chhiar sên loh a awm a, Sa tê leh sa liante chu.

²⁶Sawta saw lawngpuite a kal saw; Sawtah sâwn leviathan a awm, a chhûnga inkhêl tûra i siama chu.

²⁷Chûng zawng zawng chuan an nghâk ṭheuh che a ni, A hun taka an chaw i pêk ṭheuh ṭhinna tûrin.

²⁸Anmahni i pêk apiang an chhar ṭhîn a; I kut i phar a, ṭhatnain an tlai ṭhîn.

²⁹I hmai i thup a, an mangang ṭhîn a; An thaw chu i lâksak a, an thi a, An vaivutah chuan an kîr leh ṭhîn.

³⁰I thlarau chu i tîr chhuak a, siamin an awm ṭhîn a; Lei chung pawh hi i siam thar leh ṭhîn.

³¹ LALPA ropuina chu kumkhuain awm sela; LALPA chu a thiltihahte chuan hlim rawh se.

³²Ani chuan lei hi a en a, a khûr ṭhîn a; Tlângte chu a khawih a, a khu chhuak ṭhîn.

³³Ka dam chhûng zawngin LALPA chawimawiin hla ka sa ang a, Ka nun chhûng zawngin ka Pathian fakin ka zai ang.

³⁴Ka ngaihtuahna hi a tân thlum tak ni rawh se; Kei chu LALPA-ah chuan ka hlim ang.

³⁵Mi sualte chu lei aṭang hian tihboralin awm sela, Mi suaksualte chu awm tawh suh se. Aw ka nunna, LALPA chu fak rawh. LALPA chu fak rawh u.