Read Mizo_Old_version Sam 105 Bible Online

Sam 105 - Mizo_Old_version bible

Sam 105

¹Aw, LALPA hnênah lawm thu hril ula, a hming lam rawh u; Mi tin zîngah chuan a thiltihte chu hriattîr rawh u.

²Amah chawimawiin hla sa ula, amah fakin zai rawh u; A thil mak tih zawng zawng thu chu tîtî rawh u.

³A hming thianghlim chu chhuang rawh u; LALPA zawngtute thinlung chu hlim rawh se.

⁴ LALPA leh a chakna chu zawng ula; A hmêl chu zawng fo rawh u.

⁵Aw, a chhiahhlawh Abrahama thlahte u, Jakoba thlah, a thlante u, A thil mak tihte hre reng rawh u; A thil makte leh a kâa a rorêl chhuakte chu.

⁷Ani chu LALPA kan Pathian chu a ni a; A rorêlte chu lei chung zawng zawngah hian a awm.

⁸A thuthlun chu kumkhuain a hre ṭhîn a, Chhuan sângkhat thlenga a thu lo pêk chu;

⁹Abrahama hnêna a thuthlun leh, Isaaka hnêna a chhechham chu.

¹⁰Chu vêk chu thuruat atân Jakoba hnênah a tinghet a, Israela hnêna kumkhaw thuthlung atân:

¹¹“Kanaan ram hi ka pe ang che, I ro chanpual tûr chu,” tiin;

¹²Mi tlêm tê chauh an nih lai khan; A ni, tlêm tê mai, chumi ramah chuan mikhual an ni nghâl si a.

¹³Hnam hrang hrang hnênah an kal lâwr an kal lâwr a, Ram hrang hrang aṭangin mi hrang hrang hnênah.

¹⁴Tu ma hnehchhiah a phal lo va; A ni, anmahni avângin lalte pawh a zilhhau va;

¹⁵“Ka hriak thihate chu tawk suh ula, ka zâwlneite pawi rêng rêng pawh khawih suh u,” tiin.

¹⁶Chumi rama tla tûrin ṭâm a ko va; Ei tûr rêng a awm lohtîr ta a.

¹⁷An hmaah mi a tîr a; Josefa chu chhiahhlawh atân hralhin a awm a.

¹⁸A kete chu kawlin a tina a; Thîrkhaidiat bunin a awm ta a.

¹⁹A thu a thlen hma loh chuan, LALPA thuin amah chu a fiah ṭhîn a.

²⁰Lalber chuan mi a tîr a, a phelh a, A chhuah ta a, mi tin rorêltu ngei chuan.

²¹A chhûngte chunga hotuah leh, A sum zawng zawng chunga rorêltuah a siam a,

²²A mi liante chu duh duha phuar tûr leh, A upaho tifing tûrin.

²³Israela pawh chu Aigupta ramah a kal a; Jakoba chu Hama ramah chuan a awm ta rih a.

²⁴A mite chu nasa takin a tipung a, Anmahni dotute aiin a tichak ta zâwk a.

²⁵A mite haw tûrin an thinlung a inlamlêttîr a, A chhiahhlawhte chunga vervêk taka ti tûrin.

²⁶A chhiahhlawh Mosia chu a tîr a, A mi thlan Arona nên.

²⁷Anni chuan a chhinchhiahnate chu an zîngah an entîr a, Hama ramah chuan thil makte an entîr a.

²⁸Ani chuan thim a tîr a, a tithim ta a; Tichuan, a thute chu an hnial ta lo va.

²⁹An tuite chu thisenah a chantîr a, An sanghate chu a tihlum ta a.

³⁰An ram chu chungûin a khat ta a, An lalte pindanah lam pawh.

³¹Ani chuan thu a sawi a; tichuan, tho tam tak an lo kal a, Hrik pawh an ram chhûng zawng zawngah a lo kal bawk a.

³²An hnênah ruah aiah rial a pe a, An ramah chuan meialh zawk zawk a pe ta bawk a.

³³An grêp hruite leh an theipui kûngte a tithi a; An rama thingte chu a titliak bawk a.

³⁴Ani chuan thu a sawi a; tichuan, khaukhuapte an lo kal a, Pangangte nên, chhiar sên rual loh mai hian.

³⁵Chûngte chuan an rama thlai tinrêng chu an ei zo va, An lei rahte pawh an ei zo ta bawk a.

³⁶An rama fa tîr awm zawng zawng a tihlum a, An chakna zawng zawng rah hmasa berte chu.

³⁷Tichuan, tangkarua leh rangkachak nên a hruai chhuak ta a, Ama hnamte zîngah chuan mi chak lo pakhat mah an awm lo.

³⁸An chhuah lai chuan Aigupta-ho chu an lâwm a; Anni chu an lo hlauh tâk avângin.

³⁹Ani chuan hliahtu atân chhûm a zâmtîr a, Zâna ên tûrin mei a pe bawk a.

⁴⁰An dîl a; tichuan, vahmîm a rawn hruai a, Vân chawin anmahni a titlai ta a.

⁴¹Lungpui chu a hawng a; tichuan, tui a lo chhuak dur dur a, Hmun rovahte chuan lui ang maiin a luang ta a.

⁴²A thu thianghlim kha a hre reng si a, A chhiahhlawh Abrahama nên khân.

⁴³Tichuan, a mite chu hlim takin a hruai chhuak ta a, A mi thlante chu hla sa chung zêlin.

⁴⁴Tin, hnam tin ramte chu a peksak a; Anni chuan mi tin thawh chhuah sa chu an luah ta a;

⁴⁵A thuruatte chu an zawm theiha, A dânte chu an vawn ṭhat theih nân. LALPA chu fak rawh u.