Read Mizo_Old_version Sam 106 Bible Online

Sam 106 - Mizo_Old_version bible

Sam 106

¹ LALPA chu fak rawh u. Aw LALPA hnênah lâwm thu hril rawh u; ani chu a ṭha si a. A ngilneihna pawh kumkhuain a awm dâwn si a.

²Tu nge LALPA thiltih ropui takte chu sawi theia, A fakna zawng zawng hriattîr vek thei le?

³Rorêlna vawng ṭhate chu an eng a thâwl e, Eng lai pawha fel taka titu nên.

⁴Aw LALPA, i mite i duhsaknain mi hre reng la, Aw, i chhandamna nên mi kan ang che,

⁵I mi thlante nihlawhna ka hmuh theiha, I ro chanho nêna ka chhuan theih nân.

⁶Kan thlahtute nên khân thil kan tisual a, Thil sual kan ti a, sual takin kan ti ta a.

⁷Kan thlahtute khân Aigupta rama i thil mak tihte kha an hre thiam lo va; I ngilneihna nasa tak kha an hre reng ta lo va, Tuifinriatah an hel ta zâwk a, Tuifinriat Senah khân.

⁸Chuti chung pawhin ama hming avângin anni chu a chhandam ta a, A thiltihtheihna ropui tak chu a hriattîr theihna tûrin.

⁹Tuifinriat Sen chu a zilhhau va; tichuan, a kang ta a; Chutichuan, anni chu thlalêra hruai tlang ang maiin tui thûk takahte chuan a hruai tlang ta a.

¹⁰Anmahni hawtu kut ata chu a chhandam a, Hmêlma kut ata chu a tlan ta a.

¹¹Tuite chuan anmahni dotute chu a khuh zo va. Pakhat mah dama chhuak an awm ta lo va.

¹²Chumi lai chuan a thute chu an ring a; A fakna hla an sa a.

¹³Nimahsela, a thiltihte chu an theihnghilh ta thuai a; A remruat chu an nghâk peih lo va.

¹⁴Thlalêrah chuan thil an châk êm êm a, Ram rovah chuan Pathian an fiah ta zâwk a.

¹⁵An thil dîl chu a pe a; Nimahsela, an nunnaah chuan chêrna a luhtîr ta a.

¹⁶An riahhmunah chuan Mosia chu an îtsîk a, LALPA mi thianghlim Arona nên.

¹⁷Lei chu a âng a, Dathana chu a lem a, Abirama pâwlte chu a khuh zo ta a.

¹⁸An pâwl zîngah chuan mei tihalhin a lo awm a; Meialh chuan mi suaksualte chu a kâng ral ta.

¹⁹Horeb tlângah chuan bâwngno lem an siam a, A lem chhûn chu an be ta a.

²⁰Chutiang chuan an ropuina chu bâwngpa, hlobet ei mi ang lekah an chantîr ta a.

²¹Pathian, an chhandamtu chu an theihnghilh ta a, Aigupta rama thil ropui tak tak,

²²(Hama ramah thil mak takte, Tuifinriat Sen kamah thil râpthlâk takte) titu chu.

²³Chuvângin, a tiboral dah ang e, tia a thinrim tikîr tûrin, A mi thlan Mosia chu a luhna tûrah chuan a hmaah ding lo phei sela chuan, A tiboral ang tih a sawi a.

²⁴A ni, ram duhawm tak chu an ngainêp a, A thu chu an ring duh lo va;

²⁵An puan inahte chuan an phunnawi ta zâwk a, LALPA aw chu an ngaithla duh lo va.

²⁶Chuvângin, an lamah chuan a kut a phar a, Anniho chu thlalêra a tihtlûkna tûr leh,

²⁷An chi thlah tûrte chu hnam tin zînga a tihtlûka, Ram tina a tihdarhna tûrin.

²⁸Baal-peor lamah chuan an bet a, Mitthi hnêna thilhlante chu an ei ve ta a.

²⁹Chutiang chuan an thiltihtein ani chu an tithinur a; Tichuan, hri chu an chungah a lo lêng ta a.

³⁰Chutih lai chuan Phinehasa chu a ding a, ro a rêl a; Tichuan, hri chu tihrehin a awm ta a.

³¹Chu chu a felnaa ruat a ni, Kumkhuain, chhuan zawng zawng thlengin.

³²Meriba tuiahte pawh chuan ani chu an tithinur a, Chutichuan, anmahni avângin Mosia chungah thil ṭha lo a thleng ta hial a;

³³A thlarau chunga an hela, A hmuia ṭha lo taka a sawi avângin.

³⁴ LALPAN an hnêna tihboral thu a pêk angin mipuite chu an tiboral lo va.

³⁵Hnam tin chu an pawlh a, An thiltihte chu an zir zâwk a.

³⁶An milem rawng te an bâwl a; Chûng chu an tân thang a lo ni ta a.

³⁷A ni, ramhuai hnênah te chuan an fapate, an fanutein an inthawi a,

³⁸Thisen sawisêl bo, an fapate leh an fanute thisen ngei chu an chhuah ta a. Chûngho chu Kanaan ram milemte hnênah an inthawi a; Chumi ram chu thisenin a lo bawlhhlawh ta a.

³⁹Chutiang chuan an hnathawhtea tihbawrhbânin an awm a, An thiltihahte chuan an lo uirê ta a.

⁴⁰Chuvângin, LALPA thin chu a mite chungah a thawk a, A ro chan chu a ten ta a.

⁴¹Tichuan, anni chu hnam tin kutah a pe a; Anmahni hawtute chuan an chungah ro an rêl ta a.

⁴²Anmahni dotuten an hnehchhiah a, An kut hnuaiah chuan tihtlâwmin an awm ta a.

⁴³Vawi tam tak anni chu a chhanhim a; Nimahsela, a remruatnaah chuan an hel ṭhîn a, An khawlohnaah chuan tihhniamin an awm ta a.

⁴⁴Chuti chung pawhin ani chuan an au thâwm a hriat chuan, An mangang chu a ngaihsak a;

⁴⁵A thuthlun chu anmahni a hriatsak reng a, A ngilneihna nasat avângin a rilru a inlamlêt ta a.

⁴⁶Sala hruaitu zawng zawngte chu Anmahni a khawngaihtîr a.

⁴⁷Aw LALPA kan Pathian, min chhandam la, Hnam tin zîng ata min hruai khâwm ang che, I hming thianghlim chu fak tûr leh i fakna chhuang tûrin.

⁴⁸ LALPA, Israel-te Pathian chu fakin awm rawh se, Chatuan ata chatuan thleng pawhin. Mi zawng zawng chuan, “Amen,” ti rawh se. LALPA chu fak rawh u.