Read Mizo_Old_version Sam 107 Bible Online

Sam 107 - Mizo_Old_version bible

Sam 107

¹Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a.

² LALPA mi tlante chuan chutiang chu sawi rawh se, Dotu kut ata a tlan,

³Ram tin ata a hruai khâwm, Chhak leh thlang, chhim leh hmâr atate chuan.

⁴Thlalêra ram ro kawngah chuan an vâk an vâk a; Mihring awmna khua rêng rêng an hmu lo va.

⁵Rilṭâm leh tuihâlin An nunna chu an kawchhûngah a chau ta a.

⁶Chu veleh, an buainaah chuan LALPA chu an au va, Ani chuan an manganna atate chu a chhanhim a.

⁷Mihring awmna khuaa an kal theih nân kawng ngîl takah a hruai ta a.

⁸Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw!

⁹Ani chuan nunna thil châk êm êm chu a titlaiin, Nunna rilṭâm chu ṭhatnain a tipuar si ṭhîn a.

¹⁰Thim hnuaiah leh thihna hlima ṭhua, Hrehawmna leh thîra phuarte chu;

¹¹Pathian thu chungahte an hela, Chungnungbera remruat chu an ngaihnêp avângin;

¹²Ani chuan an thinlung chu thawh rimnain a hmin ta a; An tlu a, ṭanpuitu tûr rêng rêng an awm si lo va.

¹³Chu veleh, an buainaah chuan LALPA chu an au va, Ani chuan an manganna atate chu a chhandam a.

¹⁴Thim hnuai ata leh thihna hlim ata chu a hruai chhuak a, An phuarnate chu a tichat ta a.

¹⁵Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw!

¹⁶Ani chuan dâr kawngkhârte chu a tichhia a, A kalhna thîr tlâwnte chu a tibung ta si a.

¹⁷Mi âte chu an bawhchhiatna avâng leh, An khawlohnate avângin an intihrehawm ṭhîn a.

¹⁸An nunna chuan ei tûr tinrêng hi a ten a; Thihna kulh kawngkhârte chu an hnaih ṭhîn.

¹⁹Chu veleh, an buainaah chuan LALPA chu an au va, Ani chuan an manganna atate chu a chhandam ṭhîn.

²⁰A thu chu a tîr chhuak a, anni chu a tidam ṭhîn a, An boralna tûr atate chu a chhanhim ṭhîn.

²¹Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw!

²²Anni chuan lâwm thu sawi inthawinate chu hlân sela, A thiltihte chu hla sain hril rawh se.

²³Tuifinriatah lawng liana zuk kala, Tui zau tak chungtea hnathawk ṭhînte chuan;

²⁴Chûngte chuan LALPA thiltihte leh, Tui thûk taka a thil mak tihte chu an hmu ṭhîn.

²⁵Ani chuan thu a pe a, thlipui a tlehtîr a, Chu chuan a tuifâwnte chu a tisâng ṭhîn.

²⁶Vânah an chho tual tual a, thûk takah an chhuk leh tual tual ṭhîn a: Manganna avângin an nunna chu a tui ral ṭhîn.

²⁷Zu rui angin an thle an thle a, an pai thlawk thlawk a, Awm ngaihna rêng rêng an hre ṭhîn lo.

²⁸Chu veleh, an buainaah chuan LALPA chu an au va, Ani chuan an manganna atate chu a hruai chhuak ṭhîn.

²⁹Thlipui chu a tibâng ṭhuap a; Chutichuan, a tuifâwnte chu a reh ṭhup ṭhîn.

³⁰Tin, a reh tâk avângin an lâwm ṭhîn a; Ani chuan an ngaih tak thli ûpah chuan a hruai thleng ṭhîn.

³¹Aw, mihringte hian LALPA chu a ngilneihna avâng leh, Mihring fate chunga a thil mak tihte avâng hian fak teh sela aw!

³²Anni chuan mipui inkhâwmnaah amah chu fak sela, Upaho ṭhutnaah chuan fak rawh se.

³³Ani chuan luipuite chu thlalêrah a chantîr ṭhîn a, Tuihnate chu lei rovah a chantîr bawk ṭhîn.

³⁴Ram ṭha chu ram ro alah a chantîr ṭhîn, A chhûnga awmho suahsual avângin.

³⁵Thlalêr chu dîlah a chantîr ṭhîn a, Ram ro chu tuihnaahte a chantîr bawk ṭhîn.

³⁶Chutah chuan rilṭâmte chu a awmtîr ṭhîn, Awmna tûr khua an buatsaiha,

³⁷Lote an neiha, grêp huante an siama, A rah lo pungte chu an hmuh theihna tûrin.

³⁸Anni chu mal a sâwm ṭhîn a; chutichuan, nasa taka tihpunin an awm a; An rante chu a pulh a phal ṭhîn lo.

³⁹Tin, hnehchhiahna te, hrehawmna te leh lungngaihna te avângin An rawih ta telh telh a, an kun ta tlawk tlawk thung a.

⁴⁰Ani chuan mi liante chungah hmuhsitna a leihbaw ṭhîn a, Thlalêr, kawng rêng rêng awm lohnaah chuan a vah a vahtîr a.

⁴¹Nimahsela, retheite chu hrehawmna aṭangin hmun sângah a hlâng ṭhîn a, Ran rual angin chhûngte a siamsak ṭhîn.

⁴²Mi dik takte chuan chu chu an hmu ang a, an lâwm ang; Khawlohna zawng zawng chuan a kâ a hup ang.

⁴³Tu pawh a fing apiangin chûngte chu an vawng ṭha ang a, LALPA ngilneihnate an ngaihtuah ang.