Read Mizo_Old_version Sam 108 Bible Online

Sam 108 - Mizo_Old_version bible

Sam 108

¹Aw Pathian, ka thinlung hi a nghet a ni; Hla ka sa ang, a ni, fakna hla ka sa ang, ka ropuina ngeiin.

²Perhkhuang leh ṭingṭangte u, harh rawh u! Kei chu zîng takah ka harh ang.

³Aw LALPA, mi tin zîngah lâwm thu ka hrilh ang che, Hnam tin zîngah nangmah fakin ka zai ang.

⁴I ngilneihna chu vân khûm khawpin a nasa si a, I thutak chuan vân dumte khi a tawng hial bawk a.

⁵Aw Pathian, nang chu vân khûm daih khian chawimawiin lo awm ang che, I ropuina chu leilung zawng zawng chungah hian chawimawiin awm bawk rawh se;

⁶I duh takte hi chhanhima an awm theih nân, I kut ding lamin chhandam la, min chhâng ang che.

⁷Pathianin a thianghlimnaah chuan heti hian a sawi a, “Ka hlim ang; Sekem khua chu ka sem ang a, Sukkoth ruam chu ka sem darh bawk ang.

⁸Gilead ram chu ka ta a ni a; Manase ram chu ka ta a ni a; Ephraim ram pawh chu ka lu humhimna a ni a; Juda ram chu ka laltiang a ni.

⁹Moab ram chu ka insilna bêl a ni a; Edom ramah chuan ka pheikhawk ka paih ang a: Philistia ram chu ka au khum ang.”

¹⁰Khawpui kulh neiah chuan tuin nge mi hruai lût ang? Edom ramah chuan tuin nge mi hruai ang?

¹¹Aw Pathian, nangin min thlauthla a ni lâwm ni? Aw Pathian, kan sipaihote hnênah lah i chhuak ve ta si lo.

¹²Dotute bei tûrin min ṭanpui ang che, Mihring ṭanpuina chu engmahlo mai mai a ni si a.

¹³Pathian zârah huai takin kan ti ang, Ani chu min dotute rap bettu tûr a ni si a.