Read Mizo_Old_version Sam 109 Bible Online

Sam 109 - Mizo_Old_version bible

Sam 109

¹Aw, ka fak Pathian, ngawi reng suh ang che!

²Mi suaksual kâ leh ka bum hmang chu ka chungah an âng si a; Anni chuan lei dawtheiin ka hnênah thu an sawi a.

³Huatna thuin mi hual vêl a, Enga khaw lawi lovin mi do va.

⁴Ka hmangaih avângin mi dotute an lo ni ta a; Nimahsela, kei chu ṭawngṭai tûrin ka inpe tlat a.

⁵Anni chuan thil ṭha chu thil sualin mi rûl a, Ka hmangaihna chu huatnain mi rûl bawk a.

⁶Nangin a chungah mi sual dah la; A ding lamah hêktu ding rawh se.

⁷Rorêlsaka a awm hunah thiam loh changin chhuak sela; A ṭawngṭaina chu sualnaah lo chang rawh se.

⁸A dam chhûng nite chu tlêm sela; A hotu nihna chu mi dangin chang rawh se.

⁹A fate chu pa lovin awm sela, A nupui chu hmeithaiin awm bawk rawh se.

¹⁰A fate chu mi vâkvai lo niin, kutdawh sela; An ei tûr chu an hmun ramahte chuan zawng rawh se.

¹¹A pung ûma tangka pûktîrtu chuan a neih zawng zawng chu lâksak vek sela; Mikhualte chuan rawk sela, a thawh rim rah chu lâksak rawh se.

¹²A chunga ngilneihna lantîr zêltu tûr tu mah awm suh sela; A fa, pa nei lote chu khawngaihtu tûr tu mah awm hek suh se.

¹³A thlahte chu tihboralin awm sela; Ṭhangthar lo awm lehah chuan an hming chu thai bovin awm rawh se.

¹⁴A thlahtute khawlohna chu LALPA hnênah hriat rengin awm sela; A nu sualna chu thai bovin awm suh se.

¹⁵Chûngte chu LALPA hmaah awm fo rawh se, Ani chuan anmahni hriat rengna chu lei ata a tihboral theih nân.

¹⁶Ngilneihna lantîr nachâng a hriat lohva, Mi rethei, pachhia leh lungchhiate chu tihhlum tuma a tihduhdah zâwk avângin.

¹⁷A ni, ânchhe lawh hi a duh zâwng a ni a; tichuan, ama chungah a lo thleng a; Mi malsâwmsak hi a lâwm zâwng a ni lo va; Tichuan, amah hlat daihah a awm a.

¹⁸Kawrfuala inthuam angin ânchhe lawhnain a inthuam a, Chu chu a kawchhûngahte chuan tui angin a lût a, A ruhahte chuan hriak angin a lût bawk a.

¹⁹Chu chu a tân a inbel ṭhin silhfên angin awm sela, A inhrên fona kâwnghrên ni bawk rawh se.

²⁰Chûng chu mi dotute leh ka nunna sawichhetute LALPAN a thungrulhna a ni.

²¹Nimahsela, aw PATHIAN, Lalpa, nangin i hming avângin mi tihpui la: I ngilneihna a ṭhat avângin mi chhanhim ang che,

²²Rethei leh pachhe tak ka ni a, Ka thinlung hi ka kawchhûngah hliamin a awm bawk si.

²³Hlim ral lam tung tawh ang hian ka ral a; Khaukhuap ang hian len bovin ka awm a.

²⁴Ka khûpte hi chaw nghei avângin a chak ta lo va; Ka tîsa hian thau rêng a pu ta lo.

²⁵Anmahni sawichhiat ka lo ni ta a; Mi hmuh veleh an lu an thing ṭhîn.

²⁶Aw LALPA ka Pathian, mi ṭanpui la; Aw, i ngilneihna avângin mi chhandam ang che:

²⁷Chu chu i kut a ni tih an hriat theiha, LALPA, nangin i tih a ni tih an hriat theihna tûrin.

²⁸Annin ânchhia lawh rawh se, nang erawh chuan malsâwm zâwk ang che; An thawh veleh an mualpho vang a, i chhiahhlawh erawh chu a hlim ang.

²⁹Mi dotute chu zahna puan sintîrin awm sela, Kawra intuam angin anmahni mualphonain intuam rawh se.

³⁰Ka kâ hian LALPA hnênah lâwm thu nasa tak ka sawi ang a; A ni, mipui zîngah amah chu ka fak ang.

³¹Ani chu pachhe ding lamah a ding ang, A nunna rorêlsaktute laka chhandam tûrin.