Read Mizo_Old_version Sam 115 Bible Online

Sam 115 - Mizo_Old_version bible

Sam 115

¹Aw LALPA, keini min pe lovin, keimahni min pe lovin, I hming chu ropuina pe zâwk ang che, I ngilneihna leh i thutak avângin.

²Engati nge hnam tinin, “Khawiah nge an Pathian kha le?” an tih ni?

³Kan Pathian chu vânah a awm si a; A duh apiang a ti a ni.

⁴An milemte chu tangkarua leh rangkachak a ni a, Mihring kutchhuak an ni.

⁵Kâte an nei a, an ṭawng thei si lo va; Mitte an nei a, an hmu thei si lo va;

⁶Bengte an nei a, an hre thei si lo va; Hnârte an nei a, rim an hre thei si lo va;

⁷Kutte an nei a, eng mah an khawih thei si lo va; Kete an nei a, an kal thei si lo va; An hrawkin an ṭawng thei hek lo.

⁸Chûng siamtute chu chûng ang chuan an awm ang; A ni, chûng ringtu apiangte chu.

⁹Aw Israel-hote u, LALPA chu ring rawh u; Ani chu anmahni ṭanpuitu leh an phaw a ni.

¹⁰Aw, Arona chhûngte u, LALPA chu ring rawh u; Ani chu anmahni ṭanpuitu leh an phaw a ni.

¹¹ LALPA ṭihtute u, LALPA chu ring rawh u; Ani chu anmahni ṭanpuitu leh an phaw a ni.

¹² LALPA chuan min hre reng a; mal min sâwm ang; Israela chhûngte chu mal a sâwm ang a; Arona chhûngte chu mal a sâwm ang.

¹³ LALPA ṭihtute chu mal a sâwm ang, A lian a têin.

¹⁴ LALPA chuan tipung deuh deuh che u rawh se, Nangmahni leh in fate nên.

¹⁵ LALPA malsâwm dawngtu in ni, Ani chu lei leh vân siamtu a ni.

¹⁶Vânte khi LALPA vânte a ni a; Leilung erawh hi chu mihring fate a pe a ni.

¹⁷Mitthite chuan LALPA chu an fak lo va, Hmun reh taka chhukte rêng rêng chuan an fak hek lo;

¹⁸Keini erawh chuan LALPA chu kan fak tawh ang, Tûn aṭanga kumkhuain. LALPA chu fak rawh u.