Read Mizo_Old_version Sam 116 Bible Online

Sam 116 - Mizo_Old_version bible

Sam 116

¹ LALPA chu ka hmangaih a ni, Ka aw leh khawngaih ka dîlnate chu a ngaihthlâk avângin.

²Ka lama a beng a rawn dawh avângin ka dam chhûng zawngin amah chu ka ko vang.

³Thihna hruihrualte chuan mi zem a, Seol natnate chuan mi man a; Manganna leh lungngaihna ka lo tâwk a.

⁴Chu veleh LALPA hming chu ka lam a; “Aw LALPA, khawngaih takin ka nunna hi chhanhim ang che,” tiin.

⁵ LALPA chu mi khawngaih thei tak leh fel tak a ni a; A ni, kan Pathian chu mi lainat thei tak a ni.

⁶ LALPA chuan mi mâwlte chu a humhim ṭhîn a; Tihhniamin ka awm a, ani chuan mi chhandam ta a.

⁷Aw ka nunna, i chawlhnaah chuan kîr leh rawh; LALPA chuan i chungah ṭha takin a ti ta si a.

⁸Ka nunna hi thihna lakah, ka mitte hi mittui lakah, Ka kete hi tlûkna lakah i chhanhim si a.

⁹Mi nung ramah hian LALPA hmaah ka lêng ang.

¹⁰Ka ring a, thu ka sawi dâwn a nih hi; Nasa taka tihhrehawmin ka awm kha.

¹¹Ka hamhaihin, “Mi zawng zawng dâwt an ni,” ka lo ti ta mai a.

¹²Ka chunga a thiltih ṭhat zawng zawng avâng hian LALPA chu eng nge ka pêk ve thung ang?

¹³Chhandamna no ka la ang a, LALPA hming chu ka lam ang.

¹⁴Ka thutiamte chu LALPA lakah ka hlen ang, A ni, a mite zawng zawng hmaah chuan.

¹⁵A mi thianghlimte thihna chu LALPA ngaih chuan hlu tak a ni.

¹⁶Aw LALPA, i chhiahhlawh ka ni takzet mai; I chhiahhlawh, i bawihnu fapa chu ka ni a; Phuara ka awm chu mi phelh ta a.

¹⁷Lâwm thu sawi inthawina ka hlân ang chia, LALPA hming chu ka lam ang.

¹⁸Ka thutiamte chu LALPA lakah ka hlen ang, A ni, a mite zawng zawng hmaah chuan;

¹⁹ LALPA biak in hung chhûng kawtlaiah, Aw Jerusalem, i lai takah ka hlen ang. LALPA chu fak rawh u.