Read Mizo_Old_version Sam 118 Bible Online

Sam 118 - Mizo_Old_version bible

Sam 118

¹Aw, LALPA hnênah lâwm thu hril rawh u; ani chu a ṭha si a: A ngilneihna chu kumkhuain a awm dâwn si a.

²A ngilneihna chu kumkhuain a awm ang tih, Israel-hote chuan sawi rawh se.

³A ngilneihna chu kumkhuain a awm ang tih, Arona chhûngte chuan sawi rawh se.

⁴A ngilneihna chu kumkhuain a awm ang tih, LALPA ṭihtute chuan sawi rawh se.

⁵Ka manganna aṭangin LALPA chu ka ko va; LALPA chuan mi chhâng a, hmun thâwl takah mi awmtîr ta a.

⁶ LALPA chu ka lama ṭang a ni; ka hlau lo vang. Mihringin eng nge mi tih theih ang?

⁷ LALPA chu mi ṭanpuitu, ka lama ṭang a ni; Chuvângin, mi hawtute chungah ka duhthusâm chu ka hmu ang.

⁸Mihring rin ai chuan LALPAa rinna nghah hi a ṭha zâwk a ni.

⁹Mi liante rin ai chuan LALPAa rinna nghah hi a ṭha zâwk a ni.

¹⁰Hnam tinrêngin mi hual vêl a; Anni chu LALPA hmingin ka tiboral ang.

¹¹Anni chuan mi hual vêl a; a ni, mi hual vêl a; Anni chu LALPA hmingin ka tiboral ang.

¹²Khuai angin mi hual vêl a; Hlîng alh angin tihmihin an awm; Anni chu LALPA hmingin ka tiboral ang.

¹³Nasa taka mi beih avângin ka tlu dâwn dâwn a; Nimahsela, LALPA chuan mi ṭanpui ta hlauh va.

¹⁴Lalpa chu ka chakna leh ka hla a ni; Mi chhandamtu a lo ni ta bawk a.

¹⁵Lâwmna leh chhandamna thâwm chu mi felte puan inah a awm ṭhîn a; LALPA kut ding lam chuan huai takin a ti ṭhîn.

¹⁶ LALPA kut ding lam chu chawimawiin a awm ṭhîn a; LALPA kut ding lam chuan huai takin a ti ṭhîn.

¹⁷Ka thi lo vang, ka dam ang a, LALPA thiltihte chu ka hriattîr zâwk ang.

¹⁸ LALPA chuan nasa takin mi thunun a; Thihna hnênah erawh chuan mi pe êm lo.

¹⁹Felna kulh kawngkhârte hi mi hawnsak rawh u: Hêngah hian ka lût ang a, LALPA hnênah lâwm thu ka hril ang,

²⁰Hei hi LALPA kawngkhâr a ni; Mi felte chu an lût ang.

²¹I hnênah lâwm thu ka sawi ang, nangin mi chhângin, Mi chhandamtu i lo ni ta si a.

²²In satute lung duh loh kha, a kila lung ṭangkai ber a lo ni ta.

²³Chu chu LALPA tih a ni a; Kan mit hmuhah a mak a ni.

²⁴Hei hi LALPA ni ruat chu a ni a; Hemiah hian kan hlimin kan lâwm ang.

²⁵Aw LALPA, khawngaih takin chhandam la; Aw LALPA, khawngaih takin vânneihna rawn tîr ang che.

²⁶ LALPA hminga lo kal chu a eng a thâwl e: LALPA in aṭang hian mal kan sâwm che u a ni.

²⁷ LALPA chu Pathian a ni, ani chuan êng min pe a; Inthawina tûr chu hruihrualin thlung rawh u, maichâm ki ngeiahte chuan.

²⁸Nang chu ka Pathian i ni a, lâwm thu ka hrilh ang chia; Ka Pathian i ni a, ka chawimawi ang che.

²⁹Aw, LALPA hnênah lâwm thu hril rawh u, ani chu a ṭha si a; A ngilneihna pawh kumkhuain a awm dâwn si a.