Read Mizo_Old_version Sam 119 Bible Online

Sam 119 - Mizo_Old_version bible

Sam 119

¹Kawnga mi ṭha famkimte chu an eng a thâwl e, LALPA dân zawhtute chu.

²A thuhriattîrte zâwmtute chu an eng a thâwl e, Thinlung zawng zawnga zawngtute chu.

³A ni, anni chuan fel lohna rêng rêng an ti lo va; A kawngahte chuan an kal ṭhîn.

⁴Nangin i thununna thute chu thupêkin min pe a, Ṭhahnemngai taka kan zawm theihna tûrin.

⁵Aw, i thuruatte chu zâwm tûrin ka awm dânte hi tihnghehin awm teh sela aw!

⁶Chumi hunah chuan ka mualpho lo vang, I thupêk zawng zawng ka pawisak hunah chuan.

⁷Thinlung dik tak puin lâwm thu ka hrilh ang che, I rorêlna felte chu ka zir hunah chuan.

⁸I thuruat chu ka zâwm ang e; Aw, mi kalsan hlen suh ang che.

⁹Tleirâwlin engtin nge a awm dân a tihthianghlim ang? I thu ang zêla a awm dân vêng ṭhain.

¹⁰Ka thinlung zawng zawng hian ka zawng chia; Aw, i thupêkte ka kal bosan chu phal lul suh ang che.

¹¹I chunga thil ka tihsual loh nân i thu chu ka thinlungah ka khâwl khâwm a.

¹²Aw LALPA, i eng a thâwl e; I thuruatte chu mi zirtîr ang che.

¹³I kâa i rorêl chhuak zawng zawng chu ka hmuiin ka hriattîr ta.

¹⁴I thuhriattîr kawngah chuan ka hlim a, Hausakna zawng zawnga ka hlim ang maiin.

¹⁵I thununna thute chu ka ngaihtuah ang a, I kawngte chu ka ngaihsak bawk ang.

¹⁶I thuruat chungahte chuan ka lâwm ang a; I thu chu ka theihnghilh lo vang.

¹⁷Ka nun theihna tûrin i chhiahhlawh chungah hian ṭha takin ti ang che; Chutichuan, i thu ka zâwm ang.

¹⁸I dân thu aṭanga thil mak ka hmuh theih nân, Ka mitte hi mi tihvârsak ang che.

¹⁹Leiah hian mikhual ka ni a; I thupêkte chu ka lakah zêp suh ang che.

²⁰Ka nunna hi keh sawmin a awm a, Eng lai pawha i rorêlnate a ngaih avângin.

²¹Mi chapo, ânchhe dawngte chu i zilhhau va, I thupêk vah bosan ṭhînte chu.

²²Sawichhiatna leh hmuhsitna hi ka hnên ata la bo vang che; I thuhriattîrte chu ka zâwm si a.

²³Mi liante pawh an ṭhu a, mi sawisêl a; Nimahsela, i chhiahhlawh hian i thuruatte chu a ngaihtuah zâwk a ni.

²⁴I thuhriattîrte chu ka lâwmna a ni a, Rem mi ruatsaktute pawh a ni.

²⁵Ka nunna hi vaivutah a bet tlat a; I thu ang zêlin mi tiharh ang che.

²⁶Ka awm dânte chu ka hriattîr chia, nangin mi chhâng a; I thuruatte chu mi zirtîr ang che.

²⁷I thununna kawng chu mi hriat thiamtîr ang che; Chutichuan, i thil mak tih thute chu ka ngaihtuah ang.

²⁸Ka nunna hi lungngaih avângin a tui ral ṭhîn; I thu ang zêlin mi tichak ang che.

²⁹Awm dân dik lo hi ka hnên ata la sawn la; Khawngaih takin i dân mi pe ang che.

³⁰Awm dân rinawm ka thlang a; I rorêlnate chu ka hmaah ka awmtîr a.

³¹I thuhriattîrahte hian ka bet tlat a; Aw LALPA, mi timualpho suh ang che.

³²I thupêk kawngah chuan ka tlân ang, Ka thinlung hi i tihzau hunah chuan.

³³Aw LALPA, i thuruat kawng chu mi entîr ang che; Tichuan, a tâwp thlengin ka zawh dâwn nia.

³⁴Hriat thiamna mi pe ang che; tichuan, i dân chu ka vawng ṭha dâwn nia; A ni, ka thinlung zawng zawng hian ka zâwm ang.

³⁵I thupêk kawngah mi kaltîr ang che; Chumiah chuan ka lâwm si a.

³⁶I thuhriattîr lamah chuan ka thinlung hi thlêktîr ang che, Duhâmna lamah ni lovin.

³⁷Thil engmahlo mai mai en lo tûrin ka mit mi lâktîr la, I kawngahte chuan mi tiharh ang che.

³⁸I thu chu i chhiahhlawh hnênah hian tinghet ang che, Chu chu nangmah ṭihtu tân a ni.

³⁹Mi sawichhiatna ka hlauh hi la bo vang che; I rorêlte chu a ṭha si a.

⁴⁰Ngai teh, i thununna thute chu hriat ka châk ṭhîn a; I felna avângin mi tiharh ang che.

⁴¹Aw LALPA, i ngilneihnate chu ka hnênah lo kal rawh se, I chhandamna ngei chu, i thu ang zêlin.

⁴²Chutichuan, mi sawichhetu chhânna tûr ka nei ang; I thu ka ring si a.

⁴³Tin, thutak thu chu ka kâ ata hi la chhuak vek suh ang che; I rorêlnate chu ka beisei si ṭhîn a.

⁴⁴Chutichuan, i dân chu ka zâwm fo vang, Kumkhaw tlaitluanin.

⁴⁵Tin, dîpdâl lohvin ka lêng ang; I thununna thute chu ka zawng si a.

⁴⁶I thuhriattîr thute chu lalho hmaah ka sawi ang a, Ka zak lo vang.

⁴⁷Tin, i thupêk ka ngainat chungahte chuan ka lâwm ang.

⁴⁸I thupêk, ka ngainat lamahte chuan ka kutte ka phar ang a; I thuruatte chu ka ngaihtuah ang.

⁴⁹I chhiahhlawh hnêna thutiam chu hre reng ang che, Nangin mi beiseitîr avângin.

⁵⁰Chu chu ka hrehawmnaah pawh ka thlamuanna a ni, I thu chuan mi tiharh ta si a.

⁵¹Chapote chuan nasa takin mi nuihzatbûr a; Nimahsela, i dân chu ka kal kawisan lo.

⁵²Aw LALPA, hmasânga i rorêlte chu ka hre reng a, Ka inthlamuan ṭhîn.

⁵³Lungnihlohna nasa tak hian mi tlâkbuak ta a, Mi suaksual, i dân kalsantute avângin.

⁵⁴Ka khualzinna inah hian i thuruatte chu ka hla a ni ṭhîn.

⁵⁵Aw LALPA, zânah chuan i hming ka hre reng ṭhîn a, I dân pawh ka zâwm ṭhîn.

⁵⁶Chûng chu ka nei a, I thununna thute chu ka vawn ṭhat avângin.

⁵⁷ LALPA chu ka chanvo a ni; I thu ka zâwm ang tih ka sawi tawh kha.

⁵⁸Ka thinlung zawng zawngin i khawngaihna ka ngên a; I thu ang zêlin mi khawngaih ang che.

⁵⁹Ka awm dânte ka ngaihtuah a, I thuhriattîr lamah chuan ka ke ka pên ta a.

⁶⁰I thupêkte zâwm tûrin ka hmanhmawh a, rei ka rial lo.

⁶¹Mi suaksualho hruaihrualte chuan mi zem hlâwm reng a; Nimahsela, i dân chu ka theihnghilh lo.

⁶²Zanlaiah lâwm thu hrilh tûr chein ka tho vang, I rorêl felte avângin.

⁶³Nangmah ṭihtu zawng zawng leh, I thununna thu zâwmtute ṭhian ka ni.

⁶⁴Aw LALPA, leilung hi i ngilneihnain a khat a ni; I thuruatte chu mi zirtîr ang che.

⁶⁵Aw LALPA, i thu ang zêlin i chhiahhlawh hi i tiṭha ṭhîn.

⁶⁶Ngaihtuah thiamna leh hriatna mi zirtîr ang che; I thupêkte chu ka ring si a.

⁶⁷Tihhrehawma ka awm hma khân ka vâk bo ṭhîn a; Tûnah erawh chuan i thu ka zâwm ta.

⁶⁸Nang chu i ṭha a, thil ṭha i ti bawk a; I thuruatte chu mi zirtîr ang che.

⁶⁹Chapote chuan ka chungah dâwt an phuah chawp a; Ka thinlung zawng zawng hian i thununna thute chu ka vawng ṭha ang.

⁷⁰An thinlung chu rîlbawh thau angin a thau va; Kei erawh chu i dân chungah ka lâwm ṭhîn.

⁷¹I thuruatte ka zir theih nân Tihhrehawma ka lo awm kha ka tân a ṭha a ni.

⁷²Rangkachak leh tangkaraw sâng tam tak ai chuan, I kâa dân chhuak chu ka tân a ṭha zâwk e.

⁷³I kutin mi siamin, mi din a ni; I thupêkte chu ka zir theih nân hriat thiamna mi pe ang che.

⁷⁴Nangmah ṭihtute chuan mi hmu ang a, an lâwm ang; I thu chu ka beisei ṭhin avângin.

⁷⁵Aw LALPA, i rorêlte chu a fel tih leh, Nang chuan rinawm takin a ni mi tihhrehawm ni tih ka hria.

⁷⁶I chhiahhlawh hnêna i thutiam ang zêlin, Khawngaih takin i ngilneihna chu ka thlamuanna tûr ni rawh se.

⁷⁷Ka nun theihna tûrin i lainatnate chu ka hnênah lo kal rawh se; I dân chu ka lâwmna a ni si a.

⁷⁸Chapote chu mualphovin awm rawh se, dik lo takin mi titlâwm ta si a; Nimahsela, i thununna thute chu ka ngaihtuah ang.

⁷⁹Nangmah ṭihtute chu ka lamah hawi rawh se; Tichuan, i thuhriattîrte chu an hre dâwn nia.

⁸⁰Ka mualpho lohna tûrin, Ka thinlung hi i thuruatahte chuan ṭha famkimin awm rawh se.

⁸¹Ka nunna hi i chhandamna ngaiin a chau ta a; Nimahsela, i thu ka beisei ṭhîn.

⁸²I thu thlîr nân ka mit a vai zo ta a, “Nangin eng tikah nge mi thlamuan ang?” ka ti ka ti ṭhîn.

⁸³Meikhu ur savun peng ang chu ka lo ni ta si a; Nimahsela, i thuruatte chu ka theihnghilh lo ve.

⁸⁴I chhiahhlawh kum chin tûr hi eng zât nge ni dâwn? Mi tiduhdahtute chungah hian eng tikah nge ro i rêl dâwn?

⁸⁵Mi chapo, i dân anga awm lote chuan, Ka tlâk nân khuarkhurumte an lai a.

⁸⁶I thupêk zawng zawng chu a rinawm a ni; Anni chuan dik lo taka mi tihduhdah ṭhin hi; mi ṭanpui ang che.

⁸⁷Anni chuan leiah hian mi tiboral ṭhelh ṭhelh a; Nimahsela, i thununna thute chu ka hawisan si lo va.

⁸⁸I ngilneihna ang zêlin mi tiharh ang che; Chutichuan, i kâa thuhriattîr chu ka zâwm dâwn nia.

⁸⁹Aw LALPA, kumkhua atân i thu chu vânah nghet takin a awm a.

⁹⁰I rinawmna chu chhuan zawng zawng thlengin a awm ang: Leilung hi i tinghet a, a awm reng a ni.

⁹¹Chûngte chu vawiin hian i rorêlte angin an awm reng a; Thil zawng zawng chu i chhiahhlawhte an ni si a.

⁹²I dân chu ka lâwmna ni suh sela chuan, Ka hrehawmnaah khân ka boral tawh tûr a ni.

⁹³I thununna thute chu eng tikah mah ka theihnghilh lo vang; Nangin chûng chuan mi tiharh ta si a.

⁹⁴I ta ka nih hi, mi chhandam ang che; I thununna thute chu ka zawng si a.

⁹⁵Mi suaksualte chuan mi tihboral tumin mi nghâk ṭhîn a; Nimahsela, i thuhriattîrte chu ka ngaihtuah ang.

⁹⁶Ṭhat famkimna zawng zawng tâwp chu ka hmu ta a; I thupêk erawh chu a zau khawp mai a ni.

⁹⁷Aw, i dân hi ka va ngaina êm! Nilênga ka ngaihtuah ṭhin a ni.

⁹⁸I thupêkte chuan mi dotute aia fing zâwkin mi siam a; Kumkhuaa ka hnêna a awm fo ṭhin avângin.

⁹⁹Mi zirtîrtu zawng zawng aiin finna ka nei zâwk a ni; I thuhriattîrte hi ka ngaihtuah a nih ṭhin avângin.

¹⁰⁰Tarte ai chuan ka hre thiam zâwk a ni, I thununna thute hi ka vawn ṭhat avângin.

¹⁰¹I thu ka zawm theihna tûrin Kawng sualah rêng rêng chuan ka kete hi pên ka phal lo.

¹⁰²I rorêlna lakahte chuan ka pêng lo; Nangin mi zirtîr avângin.

¹⁰³I thute hi ka tân a va thlum êm! A ni, ka kâ atân chuan khawizû aiin a thlum zâwk.

¹⁰⁴I thununna thute avângin hriat thiamna ka nei ṭhîn; Chuvângin, awm dân dik lo tinrêng hi ka hua a ni.

¹⁰⁵I thu hi ka ke atânte hian khâwnvâr a ni a, Ka kawng atân êng a ni.

¹⁰⁶I rorêlna fel takte chu zâwm tûrin chhia ka chham a, Ka tinghet bawk a.

¹⁰⁷Nasa taka tihhrehawmin ka awm a; Aw LALPA, i thu ang zêlin mi tiharh ang che.

¹⁰⁸Aw LALPA, khawngaih takin ka kâa duhthua thilpêkte hi la la, I rorêlnate chu mi zirtîr ang che.

¹⁰⁹Ka nunna hi ka kutah a awm fo ṭhîn a; Nimahsela, i dân chu ka theihnghilh ngai lo.

¹¹⁰Mi suaksualte chuan ka awh nân thang an kam a; Nimahsela, i thununna thute chu ka vah bosan lo ve.

¹¹¹I thuhriattîrte chu kumkhuaa rochunah ka la a; Ka thinlung tihlimtu a ni si a.

¹¹²Kumkhuain, a tâwp thlengin, I thuruatte anga ti tûrin ka thinlung ka thlêktîr a.

¹¹³Rilru mumal nei lo mite chu ka hua a; I dân erawh chu ka ngaina a ni.

¹¹⁴Nang chu ka bihrûkna hmun leh ka phaw i ni a; I thu ka beisei a ni.

¹¹⁵Nangni thil ṭha lo titute u, mi kalsan rawh u; Ka Pathian thupêkte ka vawn ṭhat theih nân.

¹¹⁶Ka nun theihna tûrin i thu ang zêlin mi chelh reng la, Ka beisei chungah hian zakin mi awmtîr suh ang che.

¹¹⁷Mi kai ang che; tichuan, ka him ang a, I thuruatte chu ka pawisa fo dâwn nia.

¹¹⁸I thuruatte vah bosantu zawng zawng chu i hmusit a; An bumna chu dâwt a ni si a.

¹¹⁹Leia mi suaksual zawng zawng chu englo êkchhia angin i tibo ṭhîn a; Chuvângin, i thuhriattîrte chu ka ngaina a ni.

¹²⁰Ka tisa hi nangmah ṭihin a khûr a; I rorêlnate chu ka hlau bawk a.

¹²¹Ro ka rêl a, fel takin ka ti ṭhîn a; Mi hnehchhiahtute lakah mi thlahthlam suh ang che.

¹²²I chhiahhlawh chungchâng thu-ah a ṭhatna tûrin a bul tum la; Chapoten mi hnehchhiah suh se.

¹²³I chhandamna thlîr nân ka mit a vai zo ta a, I thu fel tak thlîr nân nên.

¹²⁴I ngilneihna avângin i chhiahhlawh chungah hian ti la, I thuruatte chu mi zirtîr ang che.

¹²⁵I chhiahhlawh ka ni a, hriat thiamna mi pe ang che; I thuhriattîrte chu ka hriat theih nân.

¹²⁶ LALPA, thawh a hun ta; I dân hi engmahlovah an siam ta si.

¹²⁷Chuvângin, i thupêkte chu rangkachak aiin ka ngaina a ni, A ni, rangkachak thianghlim ai pawhin.

¹²⁸Chuvângin, kawng tinrêng thua i thununna thu zawng zawng chu dikin ka hria a; Awm dân dik lo tinrêng hi ka hua a ni.

¹²⁹I thuhriattîrte chu a mak a; Chuvângin, ka nunna hian a vawng ṭha ṭhîn.

¹³⁰I thu hrilhfiah hian mite a tiêng a; Mi mâwlte chu a hriat thiamtîr ṭhîn.

¹³¹Ka kâ ka âng zau va, ka thaw hlawp hlawp a; I thupêkte chu ka châk avângin.

¹³²Ka lam lo hawi la, mi khawngaih ang che, I hming ngainatute i khawngaih ang khân.

¹³³Ka ke pênte hi i thu-ah tinghet la; Sualna rêng rêng ka chungah thu neihtîr suh ang che.

¹³⁴Mihring hnehchhiahna lakah chuan mi chhanhim ang che; Chutichuan, i thununna thute chu ka zâwm dâwn nia.

¹³⁵I hmêlin i chhiahhlawh hi chhun êng la; I thuruatte chu mi zirtîr ang che.

¹³⁶Ka mittui hi lui tui angin a luang thla a, I dân an zawm loh avângin.

¹³⁷Aw LALPA, nang chu i fel a, I rorêlte pawh a dik a ni.

¹³⁸I thuhriattîrte chu fel tak leh Rinawm êm êmin thu i pe a.

¹³⁹Ka ṭhahnemngaihna hian mi tiboral ta, Mi dotuten i thu an theihnghilh tâk avângin.

¹⁴⁰I thu hi a thianghlim êm êm a; Chuvângin, i chhiahhlawh hian a ngaina a ni.

¹⁴¹Mi tê leh mi hmuhsit ka ni a; Nimahsela, i thununna thute chu ka theihnghilh ngai lo ve.

¹⁴²I felna chu kumkhaw felna tûr a ni a, I dân pawh thutak a ni.

¹⁴³Manganna leh thlaphânna chuan mi tlâkbuak ta a; Nimahsela, i thupêkte hi ka lâwmna a ni.

¹⁴⁴I thuhriattîrte chu kumkhua atân a fel a ni; Hriat thiamna mi pe ang che; tichuan, ka nung reng ang.

¹⁴⁵Ka thinlung zawng zawngin ka ko chia; aw LALPA, mi chhâng ang che: I thuruatte chu ka vawng ṭha dâwn nia.

¹⁴⁶Ka ko ṭhîn chia; mi chhandam ang che. Tichuan, i thuhriattîrte chu ka zâwm dâwn nia.

¹⁴⁷Khawfîngchat chu ka khalh a, ka au ṭhîn a; I thute chu ka beisei ṭhîn.

¹⁴⁸I thu ka ngaihtuah theihna tûrin Ka mitin zân vênte chu a men khalh ṭhîn.

¹⁴⁹I ngilneihna ang zêlin ka aw hi ngaithla la; Aw LALPA, i rorêlnate ang zêlin mi tiharh ang che.

¹⁵⁰Ngaihtuahna sual ûmho chuan an rawn hnaih a; Anni chu i dân hlata awm an ni.

¹⁵¹Aw LALPA, nang chu i hnai a; I thupêk zawng zawng chu thutak a ni.

¹⁵²Hmasângah, i thuhriattîrte aṭangin, Chûng chu kumkhua atân i tinghet tih ka lo hre tawh.

¹⁵³Ka hrehawmzia hi ngaihtuah la, mi chhanhim ang che; I dân chu ka theihnghilh ngai si lo va.

¹⁵⁴Ka thu mi sawipuiin, mi tlan la; I thu ang zêlin mi tiharh ang che.

¹⁵⁵Chhandamna chu mi suaksualte lakah chuan a hla a ni; I thuruatte chu an zawn loh avângin.

¹⁵⁶Aw LALPA, i lainatnate chu a nasa a ni; I rorêlnate ang zêlin mi tiharh ang che.

¹⁵⁷Mi tiduhdahtute leh mi dotute chu tam tak an ni; Nimahsela, i thu hriattîrte chu ka kal kawisan lo.

¹⁵⁸Vervêk taka titute chu ka en a, ka lungni lo va; I thu an zawm loh avângin.

¹⁵⁹I thununna thute ka ngainatzia hi ngaihtuah la; Aw LALPA, i ngilneihna avângin mi tiharh ang che.

¹⁶⁰I thu infin khâwm chu thutak a ni a; I rorêlna fel tinrêng pawh hi kumkhuain a awm reng ang.

¹⁶¹Mi lianten enga khaw lawi lovin mi tiduhdah a; Nimahsela, ka thinlung chuan i thute a ni a hlauh ni.

¹⁶²I thu-ah hian ka hlim a ni, Thil ropui tak râllâka hmutu angin.

¹⁶³Dâwt hi ka huain ka ten a; I dân erawh chu ka ngaina a ni.

¹⁶⁴Ni khatah vawi sarih ka fak ṭhîn che a ni, I rorêl felte avângin.

¹⁶⁵I dân ngainatute chuan thlamuanna nasa tak an nei a; Tlûkna rêng rêng an nei lo.

¹⁶⁶Aw LALPA, i chhandamna ka beisei reng a, I thupêkte angin ka ti ṭhîn.

¹⁶⁷Ka nunna hian i thuhriattîrte chu a zâwm ṭhîn a; Ka ngaina êm êm a ni.

¹⁶⁸I thununna thute leh i thuhriattîrte chu ka zâwm ṭhîn; Ka awm dân zawng zawng hi i hmaa awm a ni si a.

¹⁶⁹Aw LALPA, ka au thâwm hi i hmaah lo hnai rawh se; I thu ang zêlin hriat thiamna mi pe ang che.

¹⁷⁰Khawngaih ka dîlna hi i hmaah thleng rawh se; I thu ang zêlin mi chhanhim ang che.

¹⁷¹Ka hmui hian fakna thu sawi rawh se; Nangin i thuruatte chu mi zirtîr ṭhin avângin.

¹⁷²Ka lei hi i thu fakin zai rawh se; I thupêk zawng zawng chu felna a nih avângin.

¹⁷³I kut chu mi ṭanpui tûra inpeih sain awm rawh se; I thununna thute chu ka thlang si a.

¹⁷⁴Aw LALPA, i chhandamna chu ka châk ṭhîn a; I dân chu ka lâwmna a ni.

¹⁷⁵Ka nunna hi nung rawh se; tichuan, a fak dâwn che nia; I rorêlnate pawhin mi ṭanpui rawh se.

¹⁷⁶Berâm bo angin ka vâk bo va; i chhiahhlawh hi zawng ang che; I thupêkte chu ka theihnghilh ngai si lo va.