Read Mizo_Old_version Sam 12 Bible Online

Sam 12 - Mizo_Old_version bible

Sam 12

¹ LALPA, min ṭanpui rawh; Pathian ngaihsak mi an awm tawh si lo va; Mihring fate zîng ata hi mi rinawm an bo ta si a.

²Mi tinin an vêngte hnênah thu engmahlo mai mai an sawi ṭhîn a: Mi fak derna hmui leh bumna thinlung puin thu an sawi ṭhîn.

³ LALPA chuan fak derna hmui zawng zawng chu a hlep ang a, Thu chapo tak sawina lei nên chuan;

⁴Anni chuan, “Kan lei hian kan hneh ang; Kan hmuite hi keimahni ta ngei alâwm, Tu nge kan chungah lal awm ni?” an ti ṭhîn.

⁵ LALPA chuan, “Retheite an hnehchhiah avâng leh, Pachhiate rûm avângin ka tho nghâl mai ang a; An nuihsana chu him takin ka awmtîr teh ang,” a ti a.

⁶ LALPA thute hi thu thianghlim tak a ni; Tangkarua, lei chunga rawh tuina meia fiaha, Vawi sarih tihthianghlim tawh hnu ang hi a ni.

⁷Aw LALPA, nangin anni chu i vawng ṭha ang a, Hêng ṭhangtharte lakah hian kumkhuain i humhim ang.

⁸Mihring fate zîngah hian sualna chu chawimawia a awmin, Mi suaksualte chu an vâk vêl ruai ṭhîn.