Read Mizo_Old_version Sam 132 Bible Online

Sam 132 - Mizo_Old_version bible

Sam 132

¹ LALPA, Davida chu a hrehawm tuarna zawng zawng hriatpui ang che;

² LALPA hnêna chhia chhama, Jakoba Mi Chaka hnêna thu a tiamzia kha:

³“Ka awmna inah ka lût hauh lo vang a, Ka khumah ka kai hek lo vang;

⁴Ka hahchâwl lo vang a, Mutmu ka tuah hek lo vang;

⁵ LALPA hmun tûr ka zawn chhuah hma loh chuan, Jakoba Mi Chaka awmna tûr chu,” tiin.

⁶Ngai teh, Ephratha-ah a chanchin kan hria a, Ngawbing phûlah chuan.

⁷A awmnaah chuan kal ila, A ke nghahchhan bulah chibai i bûk ang u.

⁸Aw LALPA, tho la, i chawlh hmun tûrah chuan lût ang che; Nang nên, i chakna bâwm nên.

⁹I puithiamte chu felnain inthuam sela; I mi thianghlimte chu hlimin au rawh se.

¹⁰I chhiahhlawh Davida avângin i hriak thiha hmêl chu hawi kîrtîr suh ang che.

¹¹ LALPA chuan Davida hnênah thutakin chhia a chham ta a; Chu chu a hawisan lo vang: “I taksa raha mi i lalṭhutphahah chuan ka ṭhuttîr ang.

¹²I fate chuan ka thuthlun leh, Ka thuhriattîr, anmahni ka la zirtîr tûr chu an zawm chuan, An fate pawh kumkhuain i lalṭhutphahah chuan an ṭhu zêl ang,” tiin.

¹³ LALPA chuan Zion chu a thlang si a. A awmna atân a duh a:

¹⁴“Hei hi kumkhua atâna ka chawlh hmun tûr a ni: Hetah hian ka awm reng ang; ka duh zâwng a ni si a.

¹⁵A ei tûrah mal ka sâwm rei rui ang a; A mi retheite chu chhangin ka titlai ang.

¹⁶A puithiamte chu chhandamnain ka thuam ang a; A mi thianghlimte chu hlimin an au chiam ang.

¹⁷Chutah chuan Davida ki chu ka chawr chhuahtîr ang; Ka hriak thiha tân chuan khâwnvâr ka ruat ta a.

¹⁸Amah dotute chu mualphonain ka thuam ang a; Ani chungah erawh chuan a lallukhum chu a tle sur ang,” tiin.