Read Mizo_Old_version Sam 135 Bible Online

Sam 135 - Mizo_Old_version bible

Sam 135

¹ LALPA chu fak rawh u. LALPA hming chu fak ula; Aw LALPA chhiahhlawh, LALPA ina dinga, kan Pathian in hung chhûng kawtlaia dingte u, Amah chu fak rawh u.

³ LALPA chu fak rawh u, LALPA chu a ṭha si a; A hming fakin zai rawh u, a nuam si a.

⁴ LALPA chuan Jakob-ho hi ama tân a thlang si a, Israel-ho hi a ro bîk atân a thlang bawk a.

⁵ LALPA chu ropui tak a ni tih leh, Kan LALPA chu pathian zawng zawng aiin a chungnung a ni tih ka hre si a.

⁶ LALPA chuan a duh apiang a ti ṭhîn a, Vânah te, leiah te, tuifinriatah te, tui thûk tak zawng zawngah te pawh.

⁷Ani chuan kâwlkil aṭangte chuan chhûmte a chhohtîr ṭhîn a; Kâwlphete ruah tân a siam ṭhîn a; A sum in aṭangte chuan thli a la chhuak ṭhîn.

⁸Ani chuan Aigupta rama fa tîrte chu a tihlum a, Mihring leh sate pawh.

⁹Aw Aigupta ram, ani chuan chhinchhiahnate leh thil makte i chhûngah a rawn tîr a, Pharaoa chungah leh a chhiahhlawh zawng zawng chungah chuan.

¹⁰Ani chuan hnam tam tak a tihlum a, Lal ropui tak takte a that a;

¹¹Sihona, Amor-ho lal leh, Oga, Basan ram lal leh, Kanaan rama mi zawng zawng chu:

¹²An ram chu ro chan atân a pe a, A mi Israel-ho ro chan atân.

¹³Aw LALPA, i hming chu kumkhuain a awm ang a; Aw LALPA, nangmah hriat rengna chu chhuan awm chhûng zawng a awm bawk ang.

¹⁴ LALPA chuan a mite chu ro a rêlsakin, A chhiahhlawhte chungthuah chuan a rilru a lamlêt dâwn si a.

¹⁵Hnam tin milemte chu tangkarua leh rangkachak an ni a, Mihring kutchhuak an ni.

¹⁶Kâte an nei a, an ṭawng thei si lo va; Mitte an nei a, an hmu thei si lo va;

¹⁷Bengte an nei a, an hre thei si lo va; An kâah chuan thaw rêng rêng a awm hek lo.

¹⁸Chûng siamtute chu chûng ang chuan an awm ang; A ni, chûng ringtu apiangte chu.

¹⁹Aw Israela chhûngte u, LALPA chu fak rawh u: Aw Arona chhûngte u, LALPA chu fak rawh u:

²⁰Aw Levia chhûngte u, LALPA chu fak rawh u: LALPA ṭihtute u, LALPA chu fak rawh u.

²¹ LALPA chu Zion aṭanga fakin awm rawh se, Jerusalem-a awma chu. LALPA chu fak rawh u.