Read Mizo_Old_version Sam 138 Bible Online

Sam 138 - Mizo_Old_version bible

Sam 138

¹I hnênah ka thinlung zawng zawngin lâwm thu ka sawi ang a; Pathian dangte hmaah pawh nangmah fakin ka zai ang.

²I biak in thianghlim lam hawiin chibai ka bûk ang chia, I ngilneihna leh i thutak avângin i hming ka fak ang; I thu chu i hming rêng rêng ai chuan i tilian ta si a.

³Ka auh ni che khân nangin mi chhâng a, Ka nunna tichakin mi fuih a.

⁴Aw LALPA, leia lal zawng zawng chuan lâwm thu an hrilh ang che, I kâa thu chhuakte chu an hre si a.

⁵A ni, LALPA awm dân thute chu hlaah an sa ang; LALPA ropuizia chu a nasa si a.

⁶ LALPA chu chungnung tak a ni na a, mi tlâwmte chu a ngaihsak ṭhîn a; Mi chapote erawh chu hla tak aṭangin a hre ṭhîn.

⁷Manganna zîngah lêng mah ila, nangin mi tiharh ang; Mi dotute thinur bei tûrin i kut i phar ang a, I kut ding lamin mi chhandam ang.

⁸ LALPA chuan ka chungchânga a tih tûr chu a hlen ang: Aw LALPA, i ngilneihna chu kumkhuain a awm ang a; Nangma kut thiltihte hi bânsan suh ang che.