Read Mizo_Old_version Sam 139 Bible Online

Sam 139 - Mizo_Old_version bible

Sam 139

¹Aw LALPA, nangin ngun takin mi en chhuak a, mi hre ta.

²Nangin ka ṭhut leh ka din hi i hre ṭhîn a, Ka ngaihtuahna hi hla tak aṭang pawhin i hre thiam ṭhîn.

³Ka kal leh ka mu hi mi en ngun ṭhîn a, Ka awm dân zawng zawng hi i hre vek a.

⁴Ngai teh, aw LALPA, nangin i hriat fai vek loh chu, Ka leiah hian thu rêng rêng a awm lo.

⁵Nangin ka hnung lam leh ka hma lamah mi hual a, Ka chungah i kut i nghat bawk a.

⁶Chuti kauva hriatna chu ka tân a mak lutuk a; A sâng êm a, ka phâk lo a ni.

⁷I thlarau hnên ata hi khawiah nge ka kal ang? I hma ata hi khawiah nge ka tlân bo vang?

⁸Vânah han lâwn ila, chutah chuan i awm si a; Seol-ah mutna siam ila, ngai teh, chutah chuan i awm bawk si a.

⁹Zîng thla zârin, Tuifinriat tâwp daihah va awm ila,

¹⁰Chutah pawh chuan i kutin mi hruai ang a, I kut ding lamin mi chelh dâwn si a.

¹¹“Thimin mi khuh bo tlat se, Ka vêla êng hi zân thim ni se,” ti mah ila,

¹²Thim pawhin i lakah chuan eng mah a hliah lo va, Zân hi chhûn angin a êng zâwk a ni; I tân chuan thim leh êng hi thuhmun reng a ni.

¹³Nangmah ngeiin ka rilru i nei a; Ka nu pum chhûngah mi khuh a.

¹⁴I hnênah lâwm thu ka hrilh ang che, hlauhawm tak leh mak taka siam ka ni si a; I thiltihte hi mak tak a ni a; Chu chu ka nunna hian a hre chiang hle a ni.

¹⁵A rûka siama ka awma, Lei hmun hnuaihnung bera mawi taka siama ka awm lai khân ka ruhrel chu i lakah thupin a awm lo.

¹⁶Ka rîruang la famkim lo chu i mitin a hmu a, I lehkhabuah chuan ka pêngte zawng zawng hi ziak vek a ni a, A ni têla siamin a awm zêl a, A pakhat mah la awm hmain.

¹⁷Aw Pathian, i ngaihtuahnate chu ka tân a va hlu êm! A infin khâwm chu a va nasa êm!

¹⁸Chhiar dâwn ila, a tam lam chu ṭiauvaivut aiin a tam zâwk ang; Ka han men chuan, i hnênah ka la awm cheu ṭhîn a ni.

¹⁹Aw Pathian, mi suaksualte chu i that ngei dâwn si a; Chutichuan, nangni thisen chhuah châk mite u, mi kalsan rawh u.

²⁰Anni chuan sual takin an sawichhe si chia, Nangmah dotute chuan i hming chu an sawi nawmnah ṭhîn.

²¹Aw LALPA, nangmah hawtute chu ka haw lo vem ni? Nangmah beitute chungah chuan ka lungni lo lo vem ni?

²²Anni chu huat tak têin ka hua a: Mi dotuahte ka ruat hlawm a.

²³Aw Pathian, ngun takin mi en chhuak la, ka thinlung hi hria ang che; Mi fiah la, ka ngaihtuahnate hi hria ang che;

²⁴Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che.