Read Mizo_Old_version Sam 14 Bible Online

Sam 14 - Mizo_Old_version bible

Sam 14

¹Mi â chuan a rilruin, “Pathian rêng a awm lo,” a ti a. An chhe zo va, thil tenawm tak an ti a; Tu mah thil ṭha ti rêng an awm lo.

²“Hre thiama, Pathian zawng rêng rêng an awm emaw,” tiin, LALPA chuan vân aṭangin mihring fate hi a zuk en a.

³A ni lo lamah an pêng ta vek a; bawlhhlawh takin an lo awm ta hlawm a; Tu mah thil ṭha ti rêng an awm lo, pakhat tê mah an awm lo.

⁴Thil tisualtute zawng zawng chuan hriatna rêng rêng an nei lo vem ni? Chhang an ei angin ka mite an ei zo vek ṭhîn a, LALPA lah an ko ngai hek lo.

⁵Pathian chu mi fel thlahte zîngah a awm ṭhin avângin, An hlau êm êm ang.

⁶Mi rethei remruat chu in mualphosak ṭhîn, LALPA chu a inhumhimna a nih avângin.

⁷Israel-ho chhandamna chu Zion aṭangin lo chhuak teh sela aw! LALPA chuan a mite sala an awm chu a hruai kîr leh hunah, Chumi hunah chuan Jakob-ho chu an hlim tawh ang a, Israel-ho chu an lâwm tawh ang.