Read Mizo_Old_version Sam 141 Bible Online

Sam 141 - Mizo_Old_version bible

Sam 141

¹ LALPA, ka koh che hi; ka hnênah lo kal thuai la: Ka koh chein ka awah hian beng lo chhi ang che.

²Ka ṭawngṭaina hi englo rimtui tak angin i hmaah tihchhuahin awm sela; Ka kut phar hi tlai lam inthawina angin awm rawh se.

³Aw LALPA, ka ka bulah hian vêngtu ṭhuttîr la; Ka hmui kawngkhâr hi vêng ang che.

⁴Suahsualna thilte thil tisual mite tihpui tûr chuan, Ka thinlung hi thil ṭha lo rêng rêng lamah chuan thlêktîr suh la; An ei tui tak takte chu mi eitîr suh ang che.

⁵Mi fel chuan mi vaw rawh se, khawngaihna a ni ang; Mi zilhhau rawh se, lua hriak thih ang a ni ang; Ka luin duh lo suh se. An suahsual pawhin ka ṭawngṭai zêl dâwn si a.

⁶An rorêltute chu lungpui sîrah paih thlâkin an awm a; Anni chuan ka thute chu an ngaithla tawh ang; a thlum si a.

⁷Miin a leileh a tisawm ang hian, Kan ruhte hi thlân kovah tihdarhin a awm a.

⁸Aw PATHIAN, LALPA, ka mitin i lam a en si ṭhîn a; Nangmahah chuan ka rinna ka nghat ṭhîn; ka nunna hi saruakin hnutchhiah suh ang che.

⁹Ka awh nâna thang an kam lakah chuan mi humhim ang che. Thil tisualtute thang lakah te nên.

¹⁰Keiin ka kal pelh lai takin, Mi suaksualte chu anmahni lênahte chuan tlu lût rawh se.