Read Mizo_Old_version Sam 143 Bible Online

Sam 143 - Mizo_Old_version bible

Sam 143

¹Aw LALPA, ka ṭawngṭaina hi ngaithla la; khawngaih ka dîlnaah hian beng lo chhi la; I rinawmna avâng leh i felna avângin mi chhâng ang che.

²I chhiahhlawh chungah hian rorêl suh ang che; I mit hmuhah chuan mi nung rêng rêng thiam chang an awm dâwn si lo.

³Dotu chuan ka nunna a tiduhdah si a; Ka nun hi leiah a vaw thlu a; Thi tawh daihte angin, hmun thim takahte mi awmtîr a.

⁴Chuvângin, ka thlarau hi ka kawchhûngah a chau va; Ka thinlung hi ka kawchhûngah a mangang ta a.

⁵Hmasâng nite chu ka hre reng ṭhîn a; I thiltih zawng zawng chu ka ngaihtuah ṭhîn a; I kut hnathawhte chu ka chhût ṭhîn.

⁶Ka kutte hi i lamah ka phar ṭhîn a; Ka nunna hi ram ro tak angin nangmah châkin a tuihâl ṭhîn. (Selah)

⁷Aw LALPA, mi chhâng thuai ang che; ka thlarau a chauh dâwn hi! Ka lakah hian i hmai thup suh ang che; Chuti lo chuan, khuarkhuruma chhukte ang maiin ka lo awm dah ang e.

⁸Zîngah chuan i ngilneihna thu mi hriattîr ang che; Nang ka ring si ṭhîn chia; Ka kalna tûr kawng chu mi hriattîr ang che; Ka rilru hi i hnênah ka dah tlat si ṭhîn a.

⁹Aw LALPA, mi dotute lakah chuan mi chhanhim ang che; I mi thuhrûk tûrin i hnênah ka lo tlân a ni.

¹⁰I duh zâwng tih mi zirtîr ang che, ka Pathian i ni si a; I thlarau chu a ṭha a ni; ram dik takah chuan mi hruai ang che.

¹¹Aw LALPA, i hming avângin mi tiharh la; I felna avângin ka nunna hi manganna ata hruai chhuak ang che.

¹²I ngilneihna avângin mi dotute chu tiboral la, Ka nunna timangangtu zawng zawng chu tiboral ang che; I chhiahhlawh ka ni si a.