Read Mizo_Old_version Sam 144 Bible Online

Sam 144 - Mizo_Old_version bible

Sam 144

¹ LALPA, ka lungpui chu fakin awm rawh se, Ani chuan ka kutte hi râl kah a zirtîr ṭhîn a, Ka kutzungṭangte hi bei tûrin a zirtîr bawk ṭhîn.

²Ka ngilneihna leh ka kulhpui, Ka kulhbîng sâng leh mi chhanhimtu, Ka phaw leh ka rinna nghahna, Ka hnuaia ka mite tudawl ṭhîntu chu a ni.

³ LALPA, mihring hi eng nge maw a niha, i hriat ṭhin ni? Mihring fapa pawh hi eng nge maw a niha, i ngaihtuah ṭhin ni?

⁴Mihring hi engmahlo mai ang a ni a; A dam chhûng nite chu hlim ral ṭhîn ang hi a ni.

⁵Aw LALPA, i vânte tikûnin lo chhuk la; Tlângte chu khawih ang che; tichuan, a khu chhuak ang.

⁶Kâwl phêttîr la, anniho chu tidarh ang che; I thalte chu kâp chhuak la, tibuai nuaih ang che.

⁷Chung lam aṭangin i kutin rawn ban la; Mi chhanchhuak la, tui lian atate hi mi chhanhim ang che, Mikhualte kut ata hi;

⁸An kâ chuan dâwt a sawi ṭhîn a, An kut ding lam chu dik lohnaa khat kut ding lam a ni.

⁹Aw Pathian, nangmah chawimawiin hla thar ka sa ang a; Perhkhuang hrui sâwm nei mi nên nangmah fakin ka zai ang.

¹⁰Amah chu a ni lalho hnêna chhandamna pea, Khandaih mi tikhawlo thei laka a chhiahhlawh Davida chhanchhuaktu chu ni.

¹¹Mi chhanchhuak la, mikhualte kut ata hi mi chhanhim ang che, An kâ chuan thu engmahlo mai mai an sawi ṭhîn a, An kut ding lam chu dik lohnaa khat kut ding lam a ni.

¹²Thlai ṭhang duang ang maiin kan fapate ṭhang duang sela; Kan fanute pawh lal in kil lung chher mawi ang lo ni se;

¹³Kan buhzêmte lo khatin thil tinrêng awm rei ruiin, Kan berâmte pawhin no a sânga sâng tam tak, A sînga sîng tam tak kan phûlahte nei sela;

¹⁴Kan ran rualten no hruai duah duah sela, No pai fuh lo leh chhiat awm lovin; Kan kawtthlêrahte mangang au thâwm rêng awm lo sela!

¹⁵Chutiang mite chu lâwm takin an awm ṭhîn a; A ni, LALPA Pathiana neih mite chu lâwm takin an awm ṭhîn.