Read Mizo_Old_version Sam 145 Bible Online

Sam 145 - Mizo_Old_version bible

Sam 145

¹Aw Lalber, ka Pathian, ka chawimawi ang chia; I hming hi kumkhaw tlaitluanin ka fak ang.

²Ni tin ka fak ang chia; I hming hi kumkhaw tlaitluanin ka fak ang.

³ LALPA chu a ropui a, nasa taka fak tûr a ni; A ropuizia chu chhui chhuah rual a ni lo.

⁴Chhuan khatin chhuan dang hnênah i thiltihte chu an fak chhâwng zêl ang a; I thiltih ropui takte chu an hriattîr ang.

⁵Nangmah chawimawina ropui tak leh, I thil mak tihte chu ka ngaihtuah ang.

⁶Miten i thiltih râpthlâk takte chakzia chu an sawi ang a; Kei pawhin i ropuizia ka hriattîr bawk ang.

⁷I ṭhatna ropui tak an hriat reng chu an sawi ang a, Kei pawhin i ropuizia ka hriattîr bawk ang.

⁸ LALPA chu mi khawngaih thei, lainatnaa khat, Thinnel, ngilneihna nasa tak nei a ni.

⁹ LALPA chu engkim chungah pawh a ṭha a ni; A lainatnate chu a thil siam zawng zawng chungah a awm a.

¹⁰Aw LALPA, i thil siam zawng zawng chuan i hnênah lâwm thu an hril ang a; Mi thianghlimte pawhin an fak ang che.

¹¹I ram ropuizia thu sawiin, I thiltihtheihna thu chu tîtîah an la hmang ang;

¹²Mihring fate hnênah a thiltih ropui takte leh, A ram mawina ropuizia hriattîr tûrin.

¹³I ram chu chatuan ram tûr a ni a, I thuneihna chu chhuan awm chhûng zawngin a awm reng ang.

¹⁴ LALPA chuan tlu zawng zawng chu a chelh reng ṭhîn a, Kun ngawih ngawiha awm zawng zawng chu a kaitho ṭhîn.

¹⁵I thil siam zawng zawng mitte chuan an nghâk ṭhîn che a; Nangin a hun takah an chaw i pe ṭhîn.

¹⁶I kut i phar a, Thil nung zawng zawng châkna chu i tihrehsak ṭhîn.

¹⁷ LALPA chu a awm dân zawng zawngah a felin, A thiltih zawng zawngah mi khawngaih thei tak a ni ṭhîn.

¹⁸ LALPA chuan a kotu zawng zawngte chu a hnaih ṭhîn a. Tihtakzeta amah kotu zawng zawngte chu.

¹⁹Amah ṭihtute duh chu a hlawhtlintîr ang a; An au thâwm a hria ang a, anni chu a chhandam ang.

²⁰ LALPA chuan amah hmangaihtu zawng zawng chu a humhim ṭhîn a; Mi suaksualte erawh chu a tiboral vek ang.

²¹Ka kâ hian LALPA fakna thu a sawi ang; Tin, tisa zawng zawng hian a hming thianghlim chu kumkhaw tlaitluanin fak rawh se.