Read Mizo_Old_version Sam 146 Bible Online

Sam 146 - Mizo_Old_version bible

Sam 146

¹ LALPA chu fak rawh u. Aw ka nunna, LALPA chu fak rawh.

²Ka dam chhûng zawngin LALPA chu ka fak ang a; Ka nun chhûng zawngin ka Pathian fakin ka zai ang.

³Mi liante chu ring suh ula, Mihring fapa, ṭanpuina rêng rêng awm lohna chu ring hek suh u.

⁴A thawin a chhuahsan a, ani chu a leilungah a kîr leh a; Chumi ni ngei chuan a ngaihtuahnate chu a bo nghâl a ni.

⁵Jakoba Pathian ṭanpuitua neih chu lâwm takin a awm ṭhîn, LALPA Pathiana beiseina neitu chu:

⁶Ani chu lei te, vân te, Tuifinriat te leh an chhûnga awm zawng zawng siamtu a ni; Ani chuan kumkhua atân thutak a vawng ṭha ṭhîn a,

⁷Ani chuan hnehchhiahna tuarte tân ro a rêl ṭhîn a, Ani chuan rilṭamte hnênah chaw a pe ṭhîn. LALPA chuan mi tângte chu a chhuah ṭhîn a;

⁸ LALPA chuan mitdelte mit a tivâr ṭhîn a; LALPA chuan kun ngawih ngawihte chu a kaitho ṭhîn a; LALPA chuan mi felte chu a hmangaih ṭhîn a;

⁹ LALPA chuan mikhualte chu a humhim ṭhîn a; Pa nei lo leh hmeithai chu a chelh reng ṭhîn a; Mi suaksualte kawng erawh chu a tiletling ṭhîn.

¹⁰ LALPA chu kumkhuain lalah a ṭhu ang a, Aw Zion, i Pathian chu chhuan zawng zawng thlengin lalah a ṭhu ang. LALPA chu fak rawh u.