Read Mizo_Old_version Sam 147 Bible Online

Sam 147 - Mizo_Old_version bible

Sam 147

¹ LALPA chu fak rawh u; Kan Pathian faka zai hi a ṭha si a; Chu chu a nuamin, fak hi a âwm rêng a ni.

² LALPA chuan Jerusalem chu a din leh a; Israel hnawh chhuahhote chu a hruai khâwm leh a.

³Lungchhiate chu a tidam a, An hliamte chu a tuam ṭhîn a.

⁴Arsi tam chin a chhiar a; An hming a vuah ṭheuh hlawm ṭhîn a.

⁵Kan LALPA chu a ropui a, thiltihtheih lamah pawh chak tak a ni a; A finna chuan tawpintai a nei lo.

⁶ LALPA chuan thuhnuairawlhte chu a chelh reng a; Mi suaksualte chu leiah a titlâwm ṭhîn.

⁷Lâwm thu sawia LALPA chawimawiin hla sa ula; Ṭingṭang nên kan Pathian fakin zai rawh u:

⁸Ani chuan vân khi chhûm a zâm hliahtîr a, Leilung tân ruah a buatsaih a, Tlângahte chuan hlobet a ṭotîr ṭhîn.

⁹Ani chuan sa hnênah ei tûr a pe ṭhîn, Choâk no hrâm hrâmte hnênah nên.

¹⁰Ani chu sakawr chakna chungah chuan a lâwm lo va; Mihring ke chungahte pawh lâwmna rêng rêng a nei ṭhîn lo.

¹¹ LALPA chuan amah ṭihtute chungah chuan a lâwmna a nei ṭhîn, A ngilneihna beiseitute chungah chuan.

¹²Aw Jerusalem, LALPA chu fak rawh; Aw Zion, i Pathian chu fak rawh.

¹³Ani chuan i kulh kawngkhâr kalhna thing tlâwnte chu a tikhauh va; I chhûnga i fanau awmte chu mal a sâwm si a.

¹⁴I ramri chhûngah chuan remna a siam a; Buh ṭha ber chiin a tikhat ṭhîn che a ni.

¹⁵A thupêk chu leiah hian a tîr chhuak a; A thu chu chak takin a tlân ṭhîn.

¹⁶Vûr sûr chu berâm hmul angin a pe a; Vûr tla chu vut angin a theh darh ṭhîn.

¹⁷A tui khal chu chhang them nawi angin a paih chhuak ṭhîn a; Ama vawhna hmaah chuan tu nge ding thei ang?

¹⁸A thu chu a tîr chhuak a, chûng chu a titui a; A thli a tlehtîr a, chutichuan, tuite chu a lo luang ṭhîn.

¹⁹A thu chu Jakob-ho hnênah a lantîr a, A thuruatte leh a rorêlte pawh chu Israel-ho hnênah a lantîr ṭhîn.

²⁰Ani chuan eng hnam chungah mah chutiang chuan a ti ve ngai lo; A rorêlte lah chu an hre hek lo. LALPA chu fak rawh u.