Read Mizo_Old_version Sam 148 Bible Online

Sam 148 - Mizo_Old_version bible

Sam 148

¹ LALPA chu fak rawh u. Vân aṭangte khian LALPA chu fak ula; Chung lamahte khian amah chu fak rawh u.

²A vântirhkoh zawng zawngte u, amah chu fak ula; A sipai zawng zawngte u, amah chu fak rawh u.

³Ni leh thlate u, amah chu fak ula; Arsi êng zawng zawngte u, amah chu fak rawh u.

⁴Vân sângte u, amah chu fak ula, Vân chunga tui awmte u, amah chu fak rawh u.

⁵Chûngho chuan LALPA hming chu fak rawh se; Ani chuan thu a pe a, siamin an lo awm ta si a.

⁶Ani chuan chûngho chu kumkhaw tlaitluan atân a tinghet a; Thu, boral lo tûr chu a ruat a.

⁷Lei aṭang hian, Nangni dragon-te leh tui thûk zawng zawngte u;

⁸Mei leh rial te, vûr sûr leh chhûmte u; A thu zâwm ṭhîn thlipuite u;

⁹Tlâng lian leh tlâng tê zawng zawngte u; Thing rah duhte leh sidar thing zawng zawngte u;

¹⁰Ramsate leh ran zawng zawngte u; Rannungte leh chunglêng savate u;

¹¹Leia lalte leh mi tinrêngte u; Mi liante leh leia rorêltu zawng zawngte u;

¹²Nula leh tlangvâlte; Putar leh naupangte u; LALPA chu fak rawh u.

¹³Chûngho chuan LALPA hming chu fak rawh se, A hming chauh chu chawisânin a awm si a; A ropuina chuan lei leh vân a khûm daih a ni.

¹⁴A mite ki chu a chawimawi bawk a, A mi thianghlim zawng zawng fakna chu; Israel fa, a kianga mite fakna chu. LALPA chu fak rawh u.