Read Mizo_Old_version Sam 17 Bible Online

Sam 17 - Mizo_Old_version bible

Sam 17

¹Aw LALPA, ka felna thu hi hria la, ka au thâwm hi ngaithla la; Dâwt sawi ngai lo hmui aṭanga chhuak, ka ṭawngṭainaah hian beng lo chhi ang che.

²Ka chunga thutlûkna chu i hma aṭanga chhuak ni sela; I mitin thlei bîk neih lohna chu en rawh se.

³Ka thinlung hi i fiah a; zânah mi tlawh a; Mi fiah tawh a, eng mah i hmu si lo va; Ka kâin a sawi sual lo vang ka ti tlat a ni.

⁴Mihring thiltihah zawng, i hmuia thuchhuak avângin Mi nunrâwng kawnga kal lo tûrin ka invawng ṭha a ni.

⁵Ka ke pênte hian i kawng chu a zawh tlat a, Ka kete hi a tleu ngai lo.

⁶Aw Pathian, ka ko ṭhîn chia, nangin mi chhâng dâwn si a; Ka lamah hian i beng rawn dawh la, ka thusawi hi ngaithla ang che.

⁷Aw, nangmaha rinna nghat apiang anmahni beitute laka i kut ding lama chhandam ṭhîntu, I ngilneihna mak tak chu lantîr ang che.

⁸Mi suaksual, mi tichhetu, Mi do tlata mi hual vêltute lakah chuan mitnautê angin mi vawng ṭha la, I thla hnuaiahte mi thukru ang che.

¹⁰Mahni an inchâwm thau va, An kâin chapo takin an ṭawng thîn.

¹¹Tûnah zawng kan ke pênna apiangah min hual vêl tawh a, Leia min titlu tûrin an mitte chu kan chungah an fûktîr tlat a.

¹²Anni chu sakeibaknei sa seh châk tak ang leh, Sakeibaknei vânglai hmun fianrialtea bawk reng ang mai chu an ni.

¹³Aw LALPA, tho la, Amah chu hmachhawn la, kûntîr tlat rawh; Ka nunna hi mi suaksualte lakah i khandaihin chhanhim ang che;

¹⁴Aw LALPA, i kutin mihringte lakah, Khawvêl mihringte lakah hian chhanhim ang che; Anni chanvo zawng tûn dam chhûnga an neih hi a ni a, An pum chu i rovin i tihkhahsak ṭhîn; Fate lungawi tâwk zetin an nei a, An sum hman bâng chu an fa sênte an thihsan ṭhîn.

¹⁵Kei erawh zawngin felna neiin i hmêl ka hmu ang a; Nangmah anna neia ka men hunah chuan ka lungawi tâwk zet ang.