Read Mizo_Old_version Sam 18 Bible Online

Sam 18 - Mizo_Old_version bible

Sam 18

¹Aw LALPA, ka chakna, ka hmangaih a che.

² LALPA chu ka lungpui leh, ka kulhpui leh, mi chhanhimtu a ni; Ka Pathian, ka lungpui nghet tak a ni a, amahah chuan rinna ka nghat ang; Ka phaw leh, ka chhandamna ki leh, ka kulhbîng sâng a ni.

³Fak tlâk LALPA chu ka ko vang a; Chutichuan, mi dotute lakah chhandamin ka awm ang.

⁴Thihna hruihrualte chuan mi zem a, Pathian ngaihsak lohna tuiliante chuan mi tihlau va.

⁵Seol hruihrualte chuan mi phuar vêl a; Thihna thangte chuan mi âwk a.

⁶Ka manganin LALPA chu ka ko ṭhîn a, Ka Pathian ka au ṭhîn; Ani chuan a biak in aṭang chuan ka aw a hria a, A hmaa ka au thâwm chu a bengah a lût ta a.

⁷Chu veleh lei hi a nghîng a, a khûr ta a, A thinur avângin tlângte pawh chu A nghahchhante lamin a khûrin a nghîng ta a.

⁸A hnâr aṭang chuan meikhu a chho ta ngut ngut a, A kâa chhuak mei chuan a kâng ta hluah hluah a; Chu chuan meihawl pawh a tialh ta dur dur a.

⁹Ani chuan vânte pawh a tikûn a, a chhuk ta a; A ke hnuaiahte chuan thim chhah mup hi a lo awm a.

¹⁰Cherub chungah a chuang a, a thlâwk ta a, A ni, thli thlaah te chuan a thlâwk ta thuak a.

¹¹Thim hi a bihrûkna hmunah, amah hual vêlna bûktêah a siam a; Tuia thimna, vâna chhûm chhah mupte chu.

¹²A hmaa ênna avâng chuan a chhûm chhah mupte chu a kiang a, Rialte leh meilingte a tla ta dur dur a.

¹³ LALPA chu vânahte khian a ri dur dur bawk a, Chungnungbera chuan a aw a chhuah a; Rialte leh meilingte a tla ta dur dur a.

¹⁴Tin, a thalte chu a kâp chhuak a, anniho chu a tidarh a; A ni, kâwl te a phêttîr zawih zawih reng a, a tibuai ta nuaih hlawm a.

¹⁵Chu veleh, aw LALPA, i zilhhau avânga, I hnâra thaw chhuakin a chhêm vak avâng chuan, Tui luannate chu a lo lang a, Leilung nghahchhante chu tihlanin a awm ta.

¹⁶Ani chuan chung lam aṭangin a rawn ban a, mi chelh a; Tui tam tak ata mi hnûk chhuak a.

¹⁷Mi dotu chak tak lakah chuan mi chhanhim a, Mi hawtute lakah pawh, keia tân chuan an chak lutuk si a.

¹⁸Anni chuan ka vânduai ni chuan mi bei a; Nimahsela, LALPA chu ka rin pui ber a ni.

¹⁹Ani chuan hmun thâwl takah mi hruai chhuak a; Ka chunga a lâwm avângin mi lo chhanhim ta a ni.

²⁰ LALPA chuan ka felzia ang ngeiin ka chungah a ti a; Ka kutte a thianghlimzia ang ngeiin mi rûl a ni.

²¹ LALPA kawngte chu ka zawh a, Ka Pathian hnên ata sual takin ka kal bo ngai si lo va.

²²A rorêlna zawng zawng chu ka hmaah a awm ṭhîn a, A thuruatte chu ka paih ngai si lo va.

²³Ama lakah chuan sawisêl bo ka ni bawk a, Ka khawlohna ata ka inthiarfihlîm ṭhîn.

²⁴Chuvângin, LALPA chuan ka felzia ang zêlin mi lo rûl ta a, Ka kutte a mit hmuha a thianghlimzia ang zêlin.

²⁵Mi khawngaih thei tak lakah chuan khawngaih thei takin i intilang ang a; Mi ṭha famkim lakah chuan ṭha famkimin i intilang ang a;

²⁶Mi thianghlim lakah chuan thianghlimin i intilang ang a; Tin, mi luhlul lakah chuan luhlulin i intilang ang.

²⁷Hrehawm tuar mite chu i chhandam dâwn si a, Mit chapote erawh chu i titlâwm ang.

²⁸Nangin ka khâwnvâr hi mi hâlsak dâwn si a; LALPA ka Pathian chuan ka thimna hi a tiêng ang.

²⁹Nangma ṭanpuiin râl ka bawh si a; Ka Pathian ṭanpui bawkin kulh bang ka zuan khûm a ni.

³⁰Pathian zawng, a kawng chu a ṭha famkim a; LALPA thu chu fiah a ni tawh; Amaha rinna nghat zawng zawngte tân chuan ani chu phaw a ni.

³¹ LALPA lo chu tu nge Pathian awm ni? Kan Pathian lo chu tu nge lungpui awm ni?

³²Chaknaa ka taia mi hrêngtu leh, Ka kawng tiṭha famkimtu Pathian chu.

³³Ani chuan ka ke hi zukpui ke angin a siam a, Ka hmun sâng takahte mi awmtîr ṭhîn a.

³⁴Ka kutte hi râl kâp tûrin a zirtîr ṭhîn a, Chutichuan, ka bânte hian dâr thalngul a kuai zo hial a.

³⁵Nangin i chhandamna phaw chu mi pe bawk a; I kut ding lamin mi kai a, I inngaihtlâwmnain mi siam lian ta.

³⁶Ka hnuaia ka ke pênna chu i tizau va; Tichuan, ka kete hi a tleng lo.

³⁷Mi dotute chu ka ûm ang a, ka ûm phâk mai ang; Tihborala an awm hma loh chuan ka hawi kîr tawh hek lo vang.

³⁸An thawh leh theih lohna tûrin ka sât chhawk ang a; Ka ke hnuaiah hian an tlu hlawm ang.

³⁹Nangin inbeihna atân chuan chaknain ka taiah mi hrêng si a; Mi rawn beitute chu ka hnuaiah i tudawl ta.

⁴⁰Mi hawtute chu ka tihboral theihna tûrin, Nangin mi dotute chu mi hnuchhawnin i awmtîr ta bawk a.

⁴¹Anni chu an au va; nimahsela, chhandamtu tûr tu mah an awm lo va; LALPA ngei chu an au va; nimahsela, a chhâng si lo.

⁴²Chu veleh vaivut thli chhêm len ang maiin ka vaw sawm dep a; Kawtlai chirhdiak ang mai hian ka paih chhuak ta a.

⁴³Nangin mite insualna lakahte chuan mi chhanhim a; Hnam tin lu-ah mi siam a; Ka hriat ngai loh mite chuan ka rawng an bâwl tawh ang.

⁴⁴Ka chanchin an hriat veleh ka thu an zâwm ang a; Mikhualte chu ka hnênah an intulût ang.

⁴⁵Mikhualte chu an zâm ang a, An kulhbîng atate chu khûr chungin an lo chhuak ang.

⁴⁶ LALPA chu a nung reng e; ka lungpui chu fakin awm sela; Mi chhandamtu Pathian chu chawimawiin awm rawh se;

⁴⁷Phuba mi lâksaktu leh, Mi tin ka hnuaia tudawltu Pathian ngei chu.

⁴⁸Ani chuan mi dotute lakah mi chhanchhuak a; A ni, nangin mi beitute chung lamah chuan mi chawi kâng a; Mi nunrâwng lak ata chu mi chhanhim ṭhîn.

⁴⁹Chuvângin, aw LALPA, hnam tin zîngah chuan lâwm thu ka hrilh ang chia, I hming fakin ka zai bawk ang.

⁵⁰Ani chuan chhandamna ropui tak a lal siam hnênah a pe ṭhîn a; A hriak thiha chungah, Davida leh a thlahte chung ngeiah chuan, Kumkhuain a ngilneihzia a lantîr ang.