Read Mizo_Old_version Sam 19 Bible Online

Sam 19 - Mizo_Old_version bible

Sam 19

¹Vânte khian Pathian ropuizia chu a hriattîr a; Boruak zau tak khian a kutchhuak chu a lantîr ṭhîn a.

²Chhûn hian chhûn hnênah thu a sawi chhâwng zêl a, Zân hian zân hnênah hriatna a lan chhâwntîr zêl a.

³Thusawi rêng rêng leh ṭawng rêng rêng a awm lo va; An aw chu benga hriat theih a ni lo.

⁴An tehna hrui chu leilung luah zawng zawngah zam chhuahin a awm a; An thu chu kâwlkil thlengin a thang chhuak ta a. Chûngahte chuan ni tân khian puan in a zâr a.

⁵Chu ni chu mo neitu tûr a pindan ata chhuak ang chu a ni a, Mi chak tak angin a tlânna kawnga a tlân tûr chu a hlim ṭhîn.

⁶A chhuahna chu kâwlkil tâwp aṭangin a ni a, A tlân kualna chu a tâwp lehlam thlengin a ni a, A lum hre lova thuhrûk rêng rêng a awm lo.

⁷ LALPA dân chu a ṭha famkim a, nunna a siam ṭha ṭhîn; LALPA thuhriattîr chu a rinawm a, mi mâwl a tifing ṭhîn;

⁸ LALPA thununna thu chu a dik a, thinlung a tilâwm ṭhîn; LALPA thupêk chu a thianghlim a, mitte a tivâr ṭhîn.

⁹ LALPA ṭihna chu a fai a, kumkhua atân a awm ṭhîn; LALPA rorêlnate chu a tak a, a fel vêl vek a ni.

¹⁰Chûng chu rangkachak aia duhawm zâwk a ni a, a ni, rangkachak thianghlim tam tak ai pawhin; Khawizû leh khawithlâr aiin a thlum zâwk bawk a ni.

¹¹Chu lo pawh chu, chûng chuan i chhiahhlawh hi zilhin ka awm ṭhîn a: Chûng zawm chu lâwmman nasa tak neihna a ni ṭhîn.

¹²Tuin nge mahni tihsualte hre thei ang? Sual inthupte lakah hian mi tifihlîm ang che.

¹³Thil tisual lui lo tûrin i chhiahhlawh hi mi chelh tlat la; Ka chungah thu neihtîr suh ang che; Chutichuan, ṭha famkimin ka awm ang a, Bawhchhiatna nasa tak lakah sawisêl bovin ka awm ang.

¹⁴Aw LALPA, ka lungpui leh mi tlantu, Ka kâa thuchhuakte leh ka thinlunga ngaihtuahnate hi i mit hmuhah lawm tlâk takin awm rawh se.