Read Mizo_Old_version Sam 2 Bible Online

Sam 2 - Mizo_Old_version bible

Sam 2

¹Hnam tin chu engati nge an thinura, Mi tinin engati nge thil sâwt lo an ngaihtuah?

²Leia lalten an ep huai huai a, Hotute pawhin LALPA leh a hriakthiha chu an phiar hlawm a,

³“An phuarnate hi tichatin, An hruihrualte hi kan hnên ata i paih daih ang u,” tiin.

⁴Vâna ṭhua chu a nui ang a; LALPA chuan anniho chu a nuihzatbûr ang.

⁵Chumi hunah chuan thinurin an hnênah thu a sawi ang a, Thinrim takin anmahni a timangang tawh ang:

⁶“Keimah ngeiin ka tlâng thianghlim Zion-ah chuan, Ka lal siam chu ka ṭhuttîr ta a ni,” tiin.

⁷Thuruat chu ka hril dâwn: LALPAN ka hnênah, “Nang zawng ka Fapa i ni e; Vawiin hian ka hring che a ni.

⁸Mi dîl rawh; tichuan, i rochun atân hnam tin ka pe ang chia, Kâwlkil tâwp thlengin i ro atân ka pe bawk ang che.

⁹Anni chu thîrtiangin i tikeh ang a; Bêlvawtu bêl an paih keh sawm ang hian i paih keh sawm ang,” a ti a.

¹⁰Chutichuan, aw lalte u, fing tawh ula; Leia rorêltute u, thununin awm tawh rawh u.

¹¹Ṭih chungin LALPA rawng bâwl ula, Khûr chungin lâwm rawh u.

¹²Fapa chu fâwp rawh u; chuti lo chuan, a thinur ang a, kawnglakah in boral dah ang e, A thin chu a thawk thuai dâwn si a. Amaha an rinna nghat zawng zawngte chu an eng a thâwl e.