Read Mizo_Old_version Sam 20 Bible Online

Sam 20 - Mizo_Old_version bible

Sam 20

¹Mangan ni chuan LALPAN chhâng che rawh se; Jakoba Pathian hming chuan hmun sângah hlâng che rawh se;

²Hmun thianghlim aṭang chuan ṭanpuina tirhsak che sela, Zion aṭang chuan tichak che rawh se.

³I thilhlan zawng zawng chu hre reng sela, I hâlral thilhlan chu lâwm rawh se; (Selah)

⁴I thinlung duh zâwng chu pe phal che sela, I remruat zawng zawng chu hlawhtlintîr che rawh se.

⁵I chhandamnaah chuan hlimin kan zai ang a, Kan Pathian hmingin kan puanzârte hi kan la zâr ang: LALPA chuan i dîlna zawng zawng chu hlawhtlintîr rawh se.

⁶ LALPAN a hriak thiha hi a chhandam tih tûnah ka hre ta; A kut ding lam chhandamna thain a vân thianghlim aṭang khian amah a la chhâng ang.

⁷Ṭhenkhatin tawlailîrte an ring a, ṭhenkhatin sakawrte an ring. Keini erawh chuan LALPA kan Pathian hming chu kan lam zâwk ang.

⁸Anni zawng an kûn a, an tlu ta a; Keini erawh chu kan tho va, kan ding mar ta zâwk a.

⁹ LALPA, chhandam rawh; Kan koh hun chuan Lalberin min chhâng rawh se.