Read Mizo_Old_version Sam 21 Bible Online

Sam 21 - Mizo_Old_version bible

Sam 21

¹Aw LALPA, lal chu i chaknaah hian a hlim ang a, I chhandamnaah hian a va hlim nasa dâwn êm!

²A thinlung duh zâwng chu i pe a, A hmuia a thil dîl chu i phal lo lo ve. (Selah)

³Ṭhatnaa malsâwmnatein i hmuak si a; Rangkachak thianghlim lallukhum i khumtîr a.

⁴Ani chuan nunna a dîl chia, i lo pe a; Kumkhaw tlaitluana dam rengna chu.

⁵I ṭanpui avângin a ropui êm êm a; Chawimawina leh ropuina a chungah i nghat ṭhîn a.

⁶Kumkhua atân malsâwmna nasa tak dawngin i siam si a; I hmaa hlimnain i tilâwm ṭhîn.

⁷Lal chuan LALPA chu a ring si a, Chungnungbera ngilneihna avângin a nghîng lo vang.

⁸I kutin nangmah dotu zawng zawng chu a zawng chhuak vek ang a; I kut ding lamin nangmah hawtute chu a zawng chhuak ang.

⁹I thinur hunah chuan anni chu rawh tuina meialh hluah hluah angin i siam ang. LALPA chuan anni chu thinurin a lem zo vang a, Mei chuan a kâng ral mai ang.

¹⁰An rahte chu lei ata i tiboral ang a, An thlahte chu mihring fate zîng ata i tiboral bawk ang.

¹¹I chungah khân thil sual tih an tum si a; Thil sual an ngaihtuah chhuak a, an hlen thei si lo.

¹²Nangin anni chu i hnungchhawntîr dâwn si a, I thal hruite chu an hmai tinin i kuai peih diam ang.

¹³Aw LALPA, i chaknaah chuan chawimawiin lo awm ang che; Chutichuan, i thiltihtheihna fakin hla kan sa ang.