Read Mizo_Old_version Sam 22 Bible Online

Sam 22 - Mizo_Old_version bible

Sam 22

¹Ka Pathian, ka Pathian, engah nge mi kalsan? Engah nge mi ṭanpui tûrin i hlat êma, ka rûmna thute aṭanga i hlat le?

²Aw ka Pathian, chhûnah ka au va; nimahsela, i chhâng si lo va; Zânah ka au bawk a, ka ngawi chuang lo.

³Nimahsela, aw nang Israel-ho faknaa chêng ṭhîn, Nang zawng i thianghlim a ni.

⁴Kan thlahtute chuan an lo ring chia; An ring a; tichuan, nangin i lo chhanhim ṭhîn.

⁵An au chia; tichuan, chhanhimin an lo awm ṭhîn a; An ring chia; tichuan, mualphovin an awm ngai lo.

⁶Kei erawh chu mihring rêng rêng ka ni lo va, changpât mai ka ni a; Mihringte sawichhiat leh mite hmuhsit ka ni.

⁷Mi hmu apiangin mi nuihsan a; An hmui an kum a, an lu an thing a,

⁸“LALPA chungah innghat ta che; ani chuan amah hi chhanhim ang hmiang; A chunga a lâwm avângin chhanhim ang hmiang,” an ti a.

⁹Nang erawh chu chhûl ata mi la chhuaktu chu i ni a; Ka nu hnute chunga ka awm lai khân nangin mi rintîr a.

¹⁰Chhûl aṭang rêngin nangma chunga nghah ka ni a; Nang chu ka nu pum chhûng aṭang rêngin ka Pathian i ni.

¹¹Mi hlat lul suh ang che; manganna tûr a hnai si a; Ṭanpuitu tûr rêng rêng an awm si lo.

¹²Bâwngpa tam takin mi hual vêl a; Basan rama bâwngpa chak takte chuan mi hual vêl khup a.

¹³Sakeibaknei koham hâhum hmang angin an kâin mi ân khum a.

¹⁴Tui anga leihbuakin ka awm a, Ka ruh zawng zawng pawh a pelhsawlh zo va; Ka thinlung hi khawihnûn ang a ni a; Ka rîl zîngahte hian a tui zo ta.

¹⁵Ka tha hi lampei angin a ro zo va; Ka lei pawh hi ka dangah a bet ta tlat a; Nangin thihna vaivutah hian mi hruai lût ta a nih hi.

¹⁶Uite chuan mi hual vêl si a; Thil ṭha lo titu awm khâwmte chuan mi hual tlat a; Ka kut leh ka kete hi an tipawp a.

¹⁷Ka ruh zawng zawng hi ka chhiar thei a; Anni lah chuan mi enin mi melh reng a:

¹⁸Ka silhfênte an insem a, Ka kawr atân ṭhum an vâwr a.

¹⁹Nang erawh chuan, aw LALPA, mi hlat lul suh la; Aw, mi tichaktu, mi ṭanpui tûrin hmanhmawh ang che.

²⁰Ka nunna hi khandaih lakah chuan chhanhim la; Ka neih chhun tak hi ui thiltihtheihna lakah chuan chhanhim ang che.

²¹Sakeibaknei ka aṭang chuan mi chhandam ang che; A ni, selepa kîa mi chu nangin mi chhâng ta.

²²Ka unaute hnênah i hming ka hril ang a; Inkhâwmho zîngah chuan ka fak ang che.

²³ LALPA ṭihtute u, amah chu fak rawh u; Jakoba thlah zawng zawngte u, amah chu chawimawi rawh u; Israela thlah zawng zawngte u, amah chu hlau rawh u.

²⁴Ani chuan hrehawm tuartu hrehawmzia chu a hmusit si lo va, a ten hek lo; A hmai chu a lakah a thup hek lo; Amah a auhvin a ngaithla zâwk a.

²⁵Inkhâwmna ropui taka ka fak ṭhinna che hi nangma hnêna mi a ni; Amah ṭihtute hmaah chuan ka thutiam ka hlen ang.

²⁶Thuhnuairawlhte chuan an ei ang a, an tlai ang; Amah zawngtute chuan LALPA chu an fak ang. In thinlung chu kumkhuain nungin awm rawh se.

²⁷Kâwlkila mi zawng zawng pawhin an hre leh ang a, LALPA lam an hawi tawh ang; Hnam tina chi tin i hmaah an kûn ang.

²⁸Ram chu LALPA ta a ni a, Hnam tin chunga rorêltu a ni si a.

²⁹Leia mi chapo zawng zawngte chuan bawkkhupin chibai an bûk ang a; Vaivuta chhuk tûr zawng zawngte chu a hmaah an la kûn ang, Mahni nunna tinung reng thei lote pawh chu.

³⁰Ṭhangtharten a rawng an bâwl ang a; Ṭhangthar lo awm zêlte hnênah chuan LALPA chanchin chu an hril ang.

³¹An lo kal ang a, A thu anga lo la piang tûrte hnênah chuan a felna chu an puang ang. [1]