Read Mizo_Old_version Sam 25 Bible Online

Sam 25 - Mizo_Old_version bible

Sam 25

¹Aw LALPA, ka rilru hi i hnênah ka dah tlat ṭhîn.

²Aw ka Pathian, nang ka ring chia, Mualphovin mi awmtîr suh la; Mi dotute mi ngam chu phal suh ang che.

³Ani, nangmah nghâktu rêng rêng chu tu mah mualphovin an awm lo vang; A vâng awm lova vervêk taka titute erawh chu mualphovin an awm ang.

⁴Aw LALPA, i kawngte chu mi hriattîr la; I kalkawng chanchinte mi zirtîr ang che.

⁵I thutakah chuan mi hruai la, mi zirtîr ang che, Nang chu mi chhandamtu Pathian i ni si a; Nilênga ka nghah reng che hi.

⁶Aw LALPA, i lainatnate leh i ngilneihziate chu hre reng ang che; Hmasânga lo awm kumkhua tawh a ni si a.

⁷Ka tleirâwl lai sualnate leh ka bawhchhiatnate chu hre reng suh ang che; Aw LALPA, i ṭhatna avângin, I ngilneihna avângin mi hre reng ang che.

⁸ LALPA chu a ṭhain a dik a ni; Chuvângin, mi sualte chu kawng a entîr ang.

⁹Thuhnuairawlhte chu rorêlna felah a hruai ang a; Thuhnuairawlhte chu ama kawng chanchin a zirtîr bawk ang.

¹⁰A thuthlun leh a thu hriattîrte zâwmtute tân chuan, LALPA kalkawng zawng zawngte chu ngilneihna leh thutak vek a ni.

¹¹Aw LALPA, i hming avângin Ka khawlohna ngaidam ang che, nasa tak a ni si a.

¹² LALPA ṭih mi chu tu nge ni? Chu mi chu a kawng thlan tûr chu a la entîr ang.

¹³A nunna chu nuamsa takin a awm ang a; A thlahte chuan ram chu an la luah ang.

¹⁴ LALPA thurûk chu amah ṭihtute hnênah a awm a, A thuthlun chu anmahni a hriattîr ang.

¹⁵Ka mitin LALPA lam a en fo ṭhîn; Ani chuan ka kete hi lên ata a la chhuak dâwn si a.

¹⁶Ka lamah hian lo hawi la, mi khawngaih ang che; Khawhar leh hrehawm takin ka awm si a.

¹⁷Ka thinlung buainate hi a lo nasa ta a; Aw, ka manganna atate hi mi hruai chhuak ang che.

¹⁸Ka hrehawmzia leh ka manganzia hi ngaihtuah la, Ka sual zawng zawng ngaidam ang che.

¹⁹Mi dotute chu ngaihtuah teh, tam tak an ni a; Nasa takin mi haw si a.

²⁰Aw, ka nunna vawng ṭha la, mi chhanhim ang che; Mualphovin mi awmtîr suh ang che, nangmahah chuan ka rinna ka nghat si a.

²¹Ka rilru ṭhatna leh ka diknain mi chhanhim rawh se, Ka nghâk reng si chia.

²²Aw Pathian, Israel-ho hi an manganna zawng zawng ata chhanchhuak ang che.