Read Mizo_Old_version Sam 26 Bible Online

Sam 26 - Mizo_Old_version bible

Sam 26

¹Aw LALPA, ro mi rêlsak ang che, Rilru ṭha tak puin ka awm si a.

²Aw LALPA, mi en fiahin, mi fiah la; Ringhlel lovin LALPA chu ka ring bawk a. Ka rilru leh ka thinlung hi tithianghlim ang che.

³I ngilneihna chu ka hmaah a awm si a, I thutakah ka awm fo bawk a.

⁴Mi engmahlo mai maite hnênah ka ṭhu ngai lo va; Vervêkte hnênah pawh ka lût hek lo vang.

⁵Thil ṭha lo titute inkhâwmho chu ka hua a, Mi suaksualte hnênah ka ṭhu lo vang.

⁶Ka kutte hi sawisêl bonain ka sil ang a, Chutiangin, aw LALPA, i maichâm chu ka kal hual ang;

⁷Lâwm thu sawina ka tihrîk theiha, I thil mak tih zawng zawng thute chu ka hrilh theih nân.

⁸ LALPA, i awmna in chu ka ngaina a, I ropuina awmna pawh.

⁹Ka nunna hi mi sualte zîngah la tel suh la, Ka nun pawh hi thisen chhuah hmangte zîngah la tel hek suh ang che;

¹⁰An kutah chuan ngaihtuahna sual a awm a, An kut ding lam chu thamnain a khat a.

¹¹Nimahsela, kei zawng rilru ṭha puin ka awm ang; Mi tlan la, mi khawngaih ang che.

¹²Ka ke hi hmun zâwl takah a ding a; Inkhâwmnaahte chuan LALPA chu ka fak ang.